काठमाडौं (हाम्रो खेलकुल) – हिमान्शु शाहीको अर्धशतकमा कर्णाली प्रदेशले प्रधानमन्त्री कप एकदिवसीय राष्ट्रिय प्रतियोगितामा गण्डकी प्रदेशलाई ७ विकेटले हराउँदै विजयी सुरुवात गरेको छ ।

जितको लागि १ सय २३ रनको सामान्य लक्ष्य पछ्याएको कर्णालीले ३३.२ ओभरमा ३ विकेट गुमाउँदै पूरा गर्यो । कर्णालीको जितमा हिमान्शु शाहीले ७१ बलमा ५ चौका र २ छक्कासहित सर्वाधिक ५३ रनको योगदान दिए ।

ओपनर तथा कप्तान रविन्द्रजंग शाही १९ बलमा १ चौका र २ छक्कासहित २०, निश्चल रावल २९, विपिन शाही ६ र अर्जुन घर्तीले १० रन बनाए । गण्डकीका अकिंत न्यौपानेले २ र विपिन खत्रीले एक विकेट लिए ।

त्यसअघि भैरहवामा रहेको सिद्धार्थ क्रिकेट मैदानमा टस हारेर पहिला ब्याटिङको निम्तो पाएको गण्डकीले ४५ ओभरमा ९ विकेट गुमाउँदै १ सय २२ रन बनाएको थियो । गण्डकीको लागि कमल परियार र अमृत गुरुङले सर्वाधिक २१–२१ रन बनाए । आश्वानी राना १६ र विपिन खत्री १० रन बनाए । अन्य कुनैपनि ब्याटरले दोहोरो अंकमा रन बनाउन सकेनन् ।

कर्णालीका अनुज चनारा, दीनेश अधिकारी र दीपेन्द्र रावतले २–२ विकेट लिए । प्रकाश जैसी, दीवान पुन र रविन्द्र शाहीले १–१ विकेट लिए । गण्डकी पहिलो खेलमा लुम्बिनीसँग ४ विकेटले पराजित भएको थियो । कर्णालीले मंगलबार सुदूरपश्चिमसँग खेल्नेछ ।