कानपुर (एजेन्सी)– भारतको कानपुरमा आज इङ्ल्यान्ड र घरेलु टोलीबीच तीन टि– ट्वान्टी अन्तर्राष्ट्रिय क्रिकेट श्रृखंलाको पहिलो खेल हुँदैछ । यसअघि टेस्ट र एक दिवसिय श्रृखंला गुमाइसकेको इङ्ल्यान्डको हौसला भने मजबुद रहेको कप्तान इयान मोर्गानले बताएका छन् । एक दिवसिय क्रिकेटको अन्तिम खेलमा इङ्ल्यान्डले भारतमाथि ५ रनको सनसनीपूर्ण जित निकालेको थियो ।
‘टि २० क्रिकेटमा उच्च मनोबल आवश्यक हुन्छ । भारतसँगको अन्तिम एक दिवसीय खेलको जितले मनोबल बढेको छ । मेहनत गर्दा गर्दै दोस्रो खेल सम्म नतिजा आफ्नो पक्षमा पार्न सकेनौं । त्यसले केही असर गरेको थियो । अन्तिम खेलको सफलताले हाम्रो मनोबल उच्च बनाएको छ । ’ महेन्द्र सिंह धोनीले एक दिवसिय र टि ट्वाटी कप्तानबाट राजीनामा दिएपछिको भारतको यो पहिलो टि ट्वान्टी खेल हो ।
एक दिवसियमा जस्तै विराट कोहलीले पहिलो पटक टि-२० को कप्तानी गर्दैछन् । आइपिएलमा रोयल च्यालेन्जर्सको नेतृत्व सम्हालेका कोहलीले आफैले ओपनिङ गर्ने संकेत पनि दिएका छन् ।
‘मैले भारतको लागि एक या दुइ पटक ओपनिङ गरिसकेको छु । आइपिएलमा भने मलाई राम्रै अनुभव छ’, कोहलीले भने, ‘ इङ्ल्यान्डविरुद्ध ओपनिङ गर्ने नगर्नेमा दुवै सम्भावना उस्तै छ । धेरै कुरा टोली चयनमा भर पर्दछ ।’
टि ट्वान्टीको पहिल्लो खेलमा भारत वेस्ट इन्डिजसँग १ रनले पराजित भएको थियो । भारतले पछिल्ला पाँच मध्ये ३ खेलमा हार बेहोरेको छ भने इङ्ल्यान्डले ५ खेलमा तीन जित दर्ता गरेको थियो । इङ्ल्यान्डलाई पछिल्ला टि ट्वान्टीमा पाकिस्तानले ९ रनले हराएको थियो ।
