काठमाडौँ (हाम्रो खेलकुद) – ओपनर डेविड वार्नरको आक्रामक पारीको मद्दतले पाकिस्तानविरुद्धको पाँच एकदिवसीय शृंखलाको अन्तिम खेलमा बिहिबार अष्ट्रेलियाले ५७ रनको फराकिलो जित हासिल गरेको छ। जितसंगै अष्ट्रेलियाले शृंखला ४-१ले आफ्नो पक्षमा पारेको छ।
टस जितेर पहिलो ब्याटिङ रोजेको अष्ट्रेलियाको लागि कप्तान स्टीभन स्मिथको ब्याटिङ गर्ने निर्णय सहि सावित भयो र ओपनिङ जोडीले कीर्तिमानी २ सय ८४ रनको साझेदारी गरेपछि अष्ट्रेलियाले ३६९/७को विशाल स्कोर खडा गर्यो। ओपनर ट्राभिस हेडले १ सय २८ रन जोडे भने वार्नरले आफ्नो करियरकै उत्कृष्ट स्कोर बनाए। ७८ बलमा शतक पुरा गरेका वार्नरले १ सय २८ बलमा १ सय ७९ रन जोडे। वार्नरले १९ चौका र ५ छक्का प्रहार गरेका थिए भने हेडले ९ चौका र ३ छक्का हाने। वार्नर र हेडको २ सय ८४ रनको साझेदारी ४१.३ ओभरसम्म टिकेको थियो।
अन्य कुनै ब्याट्सम्यानले उल्लेख्य प्रदर्शन गर्न नसकेपछि खेलको अन्त्यतिर अष्ट्रेलियाले सोचेजस्तो अन्त्य गर्न सकेन। एक समय चार सय रनको कोशेढुंगा पुग्ने देखिएको अष्ट्रेलिया वार्नरलाई गुमाएपछि सोचेजस्तो ब्याटिङ गर्न सकेन। पाकिस्तानका जुनेद खान र हसन अलिको नाममा २-२ विकेट रह्यो।
जवाफी ब्याटिङमा उत्रिएको पाकिस्तानको लागि सुरुवात राम्रो हुन सकेन र आफ्नो कप्तान अजहर अलिलाई ६ रनमै गुमायो। दोश्रो विकेटका लागि शर्जिल खान र बाबर आजमले १ सय ३० रनको साझेदारी गर्दै टोलीलाई उकासेका थिए। ७९ रनमा मिचेल स्टार्कको बलमा कट बिहाइन्ड हुनु अघि शर्जिलले ९ चौका र २ छक्का प्रहार गरेका थिए। तेश्रो नम्बरमा ब्याटिङ गरेका युवा खेलाडी बाबर आजमले शतक बनाए। १ सय ९ बलमा सय रन प्रहार गरेका बाबरले ७ चौका र १ छक्का प्रहार गरे।
शोएब मलिक १० रनमा रिटाएर्ड हर्ट भएपछि पाकिस्तानले ९ विकेटसम्म मात्र ब्याटिङ गरेको थियो। उमर अकमलले ४० बलमा ४६ रन बनाएपनि साथ दिने कोहि नहुँदा पाकिस्तान ३ सय १२ रनमा अलआउट भएको थियो। अष्ट्रेलियाका मिचेल स्टार्कले ४ विकेट र प्याट कमिन्सले २ विकेट लिए। जोश हेजलवुड, एडम जाम्पा र जेम्स फक्नरको नाममा १-१ विकेट रह्यो।
अन्तिम खेलको म्यान अफ द म्याच बनेका वार्नर म्यान अफ द सिरिज पनि घोषित भए।
