काठमाडौँ (हाम्रो खेलकुद) – दक्षिण अफ्रिमा जारी आईसिसी यु–१९ विश्वकप अन्तर्गत सुपर सिक्स चरणको पहिलो खेलमा बंगलादेशविरुद्ध पहिले ब्याटिङ गरिरहेको नेपालले सम्हालिने प्रयास गरिरहेको छ ।

खराब सुरुवात गरेपनि चौथो विकेटका लागि कप्तान देव खनाल र विशाल विक्रम केसीले इनिङ सम्हाल्ने प्रयास गरिरहेका छन् । २५ ओभरको समाप्तीमा नेपालले ३ विकेटको क्षतिमा ७७ रन जोडेको छ । २५ औं ओभरको समाप्तीमा देव २८ र विशाल १४ रनमा नटआउट छन् ।

टस जितेर पहिले ब्याटिङ गरिरहेको नेपालले पहिलो पावरप्लेमा ३ विकेट गुमाएको थियो । १० ओभरको समाप्तिमा नेपालले ३५ रनमा ३ विकेट गुमाएको थियो । नेपालका ओपनर द्वय अर्जुन कुमाल, विपिन रावल र तीन नम्बरमा आएका आकाश त्रिपाठी पेभेलियान फर्किएका थिए ।

विपिन रावल चौथो ओभरको पाँचौ बलमा मरुफ मृधाको बलमा मोहम्मद रिजवान चौधरीको हातबाट स्लिपमा क्याच आउट भएका थिए । उनले १२ बल खेलेर २ रन बनाए । त्यसपछि आउट हुने आकाश त्रिपाठी थिए । उनी १३ बलमा ३ रन बनाएर इक्बाल होसेन इमोनको बलमा आठौ ओभरको पाचौ बलमा रिजवानकै हातबाट क्याच आउट भए ।

अर्जुन कुमाल भने रोहानत बोर्सोनको बलमा नवौ ओभरको तेस्रो बलमा २६ बलमा २ चौका सहित १४ रन बनाएर मृधाको बलमा क्याच आउट भए ।

नेपालले आज टोलीमा २ परिवर्तन गरेको छ । तिलकराज भण्डारी र दीपक डुम्रेको स्थानमा आज अलराउन्डर विशाल विक्रम केसी र तीव्र गतिका बलर दुर्गेश गुप्ता टोलीमा आएका छन् । विशाल प्रतियोगितामा पहिलो पटक खेलिरहेका छन् ।

नेपालको प्लेइङ ११ – अर्जुन कुमाल, विपिन रावल, आकाश त्रिपाठी, देव खनाल (कप्तान), विशाल विक्रम केसी, गुलशन झा, दिपक बोहोरा, दीपेश कंडेल, सुभाष भण्डारी, आकाश चन्द, दुर्गेश गुप्ता