नागपुर (एजेन्सी) – अन्तिम ओभरमा जस्प्रित बुमराहले राम्रो प्रदर्शन गरेपछी १ सय ४५ रनको लक्ष्य जोगाउदै भारतले दोस्रो टि-२० जित्दै तिन खेलको श्रृंखलामा १-१ बराबरी गरेको छ ।

टस जितेर भारतलाई ब्याटिङ गर्न निम्त्याएको इङ्ल्याण्डसामु घरेलु टोलीले निर्धारित २० ओभरमा १४४/८ को स्कोर खडा गरेको थियो । भारतकोलागी केएल राहुलले सार्वाधिक ७१ रन जोडेका थिए । उनले ४७ बलको सामना गर्दै २ छक्का र ६ चौकाको मद्धतले ७१ रन बनाएका थिए । कप्तान विराट कोहलीले २१ र मनिष पाण्डेले ३० रन बनाउन बाहेक अन्य ब्याट्सम्यानले दोहोरो अंक छुन सकेनन। इङ्ल्याण्डकालागी जोर्डनले ३ विकेट लिएका थिए ।

१ सय ४५ रनको लक्ष्य पछ्याएको इङ्ल्याण्डले अन्तिम ओभरमा ८ रन जोड्न नसक्दा ५ रनको पराजय भोगेको हो । अन्तिम ओभरमा ८ रन बाकी हुँदा पहिलो बलमा जो रुट ३८ रन बनाउदै आउट भएका थिए भने चौथो बलमा बटलर पेभिलियन फर्किएका थिए । सुरुको २ ओभरमा १५ रन खर्चेका बुमराहले १८औं र २०औं ओभरमा ५ रन खर्चेर २ विकेट लिएका थिए । इंग्ल्यान्डका लागि जो रुट र बेन स्टोक्सले समान ३८ रन बनाएका थिए। भारतका आसिश नेहराले तिन विकेट लिए।

शृंखलाको अन्तिम खेल बुधबार हुनेछ।