फ्लोरिडा (हाम्रो खेलकुद)- नेपाल र श्रीलंकाबीच मंगलबार हुने टि ट्वान्टी विश्वकपको समूह चरणको खेल वर्षाले प्रभाव पार्ने सम्भावना बढेको छ ।

समूह डीमा नेपाल र श्रीलंकाबीच स्थानीय समयअनुसार मंगलबार राति ७:३० बजे (नेपाली समयअनुसार बुधबार बिहान ५:१५ बजे) बीच सुरु हुने तालिका छ।
नेपाल र श्रीलंका दुबै अंक विहिन छन् ।

नेपालले नेदरल्याण्ड्सको पहिलो खेल गुमाएको थियो। पहिलो खेलमा दक्षिण अफ्रिकासँग पराजित श्रीलंकाले बंगलादेशसँगको खेल पनि गुमाएको थियो।

पहिलो जितको अपेक्षासहित उत्रने नेपाल र श्रीलंकाबीच दुवै टोलीलाई फ्लोरिडाको ब्रोवार्ड काउन्टीको मौसम अनुकूल हुने सम्भावना कम छ। खेल हुने स्टेडियम क्षेत्रमा विहानदेखि नै निरन्तर वर्षा भइरहेको छ ।

नेपाल र श्रीलंकाको खेल हेर्नका लागि अमेरिकाका विभिन्न राज्यबाट समर्थक यहाँ आएका छन्
। नेपाल र श्रीलंका पहिलो पटक एकअर्का विरुद्ध खेल्दै छन्।

अमेरिकाका ३ स्थानमा विश्वकपका खेल सन्चालन भएका छन्। डालासमा ४ खेल‌ सम्पन्न भइसकेका छन् भने फ्लोरिडामा नेपाल‌ र श्रीलंकाबीच पहिलो खेल हुँदैछ। न्युयोर्कमा पनि विश्वकपका खेल भइरहेका छन्।
समूह चरणका अन्तिम २ खेलका लागि नेपाली टोली वेस्ट इन्डिज जानेछ।