एजेन्सी – इंग्ल्याण्ड टेस्ट टोलीका पूर्व कप्तान जोय रुटले वेस्ट इन्डिजका चर्चित ब्याटर ब्रायन लारालाई पछि पारेका छन् ।

रुट लारालाई पछि पार्दै टेस्ट क्रिकेटमा सर्वाधिक रन बनाउने खेलाडीको सूचीमा सातौं स्थानमा उक्लिएका छन् ।

सुचीको आठौं स्थानमा रहेका लाराले १ सय ३१ टेस्ट खेलमा ११ हजार ९ सय ५३ रन बनाएका छन् । सातौं स्थानमा उक्लिएका रुटको १ सय ४३ खेलमा १२ हजार २७ रन पुगेको छ ।

वेस्ट इन्डिजविरुद्ध जारी तेस्रो टेस्टका क्रममा रुटले यो कीर्तिमान बनाएका हुन् । रुटले दोस्रो दिनको खेलमा १ सय २४ बलमा ८७ रन जोड्दै लारालाई पछि पारे ।

३ टेस्टको सिरिजको अन्तिम खेलको दोस्रो दिन घरेलु टोलीले ३ सय ७६ रन बनाउँदै अल आउट भयो । दोस्रो दिन ओली पोप ४ रन थप्दै १० रनमा आउट भए । रुट ८५ रन जोड्दै ८७ रनमा आउट भए ।

जेमी स्मिथले १ सय ९ बलमा ९५ तथा क्रिस वोक्सले ७८ बलमा ६२ रन बनाए । कप्तान बेन स्टोक्सले ५४ रन जोड्दा गस एटकिन्सनले २१ रन थपे ।

वेस्ट इन्डिजका अल्जारी जोसेफले ४, जयडेन सेल्सले ३, शेमार जोसेफले २ विकेट लिए ।

त्यसअघि टस जितेर ब्याटिङ गरेको वेस्ट इण्डिज अलआउट हुँदै २ सय ८२ रन बनाएको थियो। दोस्रो दिन वेस्ट इन्डिजले दोस्रो इनिङको ब्याटिङ सुरु गरेको छ।

३ टेस्टको सिरिजका लागि वेस्ट इण्डिज इंग्ल्याण्ड भ्रमणमा रहेको छ । सुरुआती २ टेस्ट हारेको पाहुना टोलीले सिरिज गुमाइसकेको छ ।