एजेन्सी – इङ्ग्ल्यान्ड भ्रमणमा रहेको श्रीलंकाविरुद्धको दोस्रो टेस्टको दोस्रो इनिङमा घरेलु टोलीले अग्रता फराकिलो बनाउँदै छ ।

श्रीलंकाविरुद्ध दोस्रो दिन शुक्रवारको अन्तिम तिर दोस्रो इनिङको सुरुवात गरेको घरेलु टोलीले १ विकेटको नोक्सानीमा २५ रन बनाएको छ । घरेलु टोली पहिलो इनिङमा २ सय ३१ रनको अग्रता कायम गर्न सफल भएको थियो ।

घरेलु टोलीका बेन डुकेट १५ तथा कप्तान ओली पोप २ रन बनाएर नट आउट छन् । ड्यान लरेन्स ७ रनमा आउट भए । पाहुना टोलीका लागि लाहिरु कुमाराको नाममा १ विकेट रह्यो ।

पहिलो इनिङमा पाहुना टोलीले १ सय ९६ रन मात्र जोड्यो । टोलीका कमिन्डु मेन्डिसले सर्वाधिक ७४ रन जोडे । दिनेश चन्डिमलले २३, एन्जेलो म्याथ्युजले २२, मिलन रत्नायकेले १९ तथा पथुम निशंकाले १२ रन बनाए ।

घरेलु टोलीका लागि म्याथ्यु पोट, क्रिस वोक्स, गस एटकिन्सन र ओली स्टोनले समान २ तथा शोयव बसिरले १ विकेट आफ्नो नाममा गरे ।

त्यसअघि टस हारेर ब्याटिङको निम्तो पाएको इङ्ल्यान्डले पहिलो इनिङमा ४ सय २७ रनमा बनाएको थियो ।

घरेलु टोलीका लागि गस एटकिन्सन र जोय रुटले शतकीय पारी खेलेका थिए । रुटले २ सय ६ बलमा १ सय ४३ रनको शतकीय पारी खेले । रुटको टेस्ट क्रिकेटमा यो ३३औं शतक हो ।

रुटले इङ्ग्ल्यान्डका लागि टेस्ट क्रिकेटमा सर्वाधिक शतक बनाउँने एलेस्टर कुकको कीर्तिमानलाई बराबरी गरेका थिए । कुकले १ सय ६१ खेलमा ३३ शतक बनाएका थिए ।

रुटले १ सय ४५ खेलमा ३३ शतक बनाउँदै रुटको कीर्तिमानलाई बराबरी गरेका हुन् । टेस्टमा सर्वाधिक शतक बनाउँने खेलाडीको शीर्ष स्थानमा भने भारतका सचिन तेन्दुल्कर छन् । सचिनले २ सय खेलमा ५१ शतक बनाएका थिए।

एटकिन्सनले १ सय १५ बलमा १ सय १८ रन बनाएका थिए । एटकिन्सनको यो पहिलो टेस्ट शतक रहेको थियो । ओपनर बेन डुकेटले ४०, ह्यारी ब्रुकले ३३, जेमी स्मिथ र म्याथ्यु पोटले समान २१ तथा ड्यान लरेन्सले ९ रन जोडे ।

पाहुना टोलीका लागि पहिलो इनिङमा अशिथा फर्नान्डोले ५, लाहिरु कुमारा र मिलन रत्नायकेले समान २ तथा प्रबात जयसुर्याले १ विकेट लिए । पहिलो टेस्ट घरेलु टोलीले ५ विकेटले जितेको थियो ।