चितवन (हाम्रो खेलकुद) – राष्ट्रव्यापी एक्सपर्ट स्कुल क्रिकेट लिग चितवनको उद्घाटन खेलमा भरतपुरको एडभेन्चर स्कुलले बालकुमारी इङ्लिस स्कुललाई ७१ रन हराएको छ । १ सय १७ रनको लक्ष्य पछयाएको बालकुमारीले ११.१ ओभरमा सबै विकेट गुमाएर ४५ मात्र बनाउन सक्यो ।

बालकुमारीलाई सस्तैमा समेट्ने क्रममा पवन घलेले ४ विकेट तथा प्रयास गौतम र प्रबत श्रेष्ठले समान ३ विकेट लिए । बालकुमारीका लागि विवेक कुमारले १६ रन बनाएका थिए । बाँकीले दोहारो अंकमा रन बनाउन सकेनन् । त्यसअघि टस हारेर ब्याटिङ गरेको एडभेन्चरले निर्धारित २० ओभरमा ६ विकेटको क्षतिमा १ सय १६ रन बनाएको थियो ।

टोलीका लागि पवन २३ र विनोद गुरुङले २२ रन बनाए । बालकुमारीका शीरिष मास्केले २ विकेट लिए ।अलराउण्ड प्रदर्शन गरेका पवन प्लेयर अफ द म्याच घोषित भए । खेल हेर्न आएका दर्शकमध्येका अजय श्रेष्ठ गोलामार्फत एक्सपर्ट फ्यान अफ द डे चुनिएका थिए ।

उनलाई मुख्य प्रायोजक एक्सपर्ट एजुकेशन एण्ड भिजा सर्भिसेसले २ हजार रुपैयाँ प्रदान ग¥यो । प्याब्सन चितवनका अध्यक्ष देशबन्धु अधिकारी प्रमुख अतिथि र विशेष अतिथि एक्सपर्ट चितवनका डिरेक्टर डिल्लीराम अधिकारी रहनुभएको कार्यक्रम हिमालयन क्रिकेट एकेडेमीका संस्थापक सुवास प्रधानको सभापतित्वमा सम्पन्न भएको थियो ।

एक्सपर्ट एजुकेशन एण्ड भिजा सर्भिसेस प्रतियोगिताको मुख्य प्रायोजक रहेको छ । हिमालयन क्रिकेट एकेडेमी, काठमान्डौको आयोजनामा आजबाट सुरु भएको प्रतियोगिता फागुन ८ गतेसम्म विशाल चोकको नौ बिगाहा मैदानमा चल्नेछ ।