एजेन्सी – इङ्ग्ल्यान्डलाई हराउदै वेस्ट इन्डिजले युएईमा जारी महिला टि ट्वान्टी विश्वकपको सेमिफाइनलमा स्थान बनाएको छ । मंगलवार भएको खेलमा इङ्ग्ल्यान्डलाई ६ विकेटले पराजित गर्दै वेस्ट इन्डिजले सेमिफाइनलमा स्थान बनाएको हो ।

इङ्ग्ल्यान्डले दिएको १ सय ४२ रनको लक्ष्य वेस्ट इन्डिजले १८ ओभरमा ४ विकेट गुमाएर पूरा गर्यो । वेस्ट इन्डिजको जितमा हेलि म्याथ्युज र क्विना जोसेफले अर्धशतकीय इनिङ खेले । जोसेफले ३८ बलमा ६ चौका र २ छक्काको सहयोगमा ५२ तथा कप्तान म्याथ्युजले ३८ बलमा ७ चौका र १ छक्काको सहयोगमा ५० रन बनाइन् ।

डिरेन्द्र डोटिनले १९ बलमा २७ रन बनाईन् । इङ्ग्ल्यान्डका लागि नाट सिभर ब्रुन्ट, सोफि इलस्टोन र सारा ग्लेनले समान १ विकेट लिईन् ।

त्यसअघि टस हारेर ब्याटिङको निम्ता पाएको इङ्ग्ल्यान्डले २० ओभरमा ७ विकेट गुमाएर १ सय ४१ रनको योगफल तयार गरेको थियो । इङ्ग्ल्यान्डका लागि नाट सिभर ब्रुन्टले ५० बलमा ५ चौकाको सहयागमा ५७ रन बनाईन् । कप्तान हेटर नाइट्सले १३ बलमा २१ तथा डानी हजले १२ बलमा १६ रन बनाईन् ।

वेस्ट इन्डिज सेमिफाइनल प्रवेशसँगै विश्वकपमा सेमिफाइनल पुग्ने चार टोलीको तय भएको छ । समूह ए को विजेताको रुपमा अस्ट्रेलिया र उपविजेताको रुपमा न्युजिल्यान्ड सेमिफाइनल प्रवेश गरेका छन् । समूह बी बाट विजेताको रुपमा वेस्ट इन्डिज र उपविजेताको रुपमा दक्षिण अफ्रिकाले सेमिफाइनलमा स्थान बनाए ।

बिहीवार हुने पहिलो सेमिफाइनलमा अस्ट्रेलिया र दक्षिण अफ्रिका तथा शुक्रवार हुने दोस्रो सेमिफाइनलमा न्युजिल्यान्ड र वेस्ट इन्डिज खेल्दै छन् ।