एजेन्सी – भारतका स्पिन बलर वासिंटन सुन्दरको सानदार बलिङको सहयोगमा भारतले न्युजिल्याण्डलाई कम रनमा नै रोकेको छ ।

भारतविरुद्धको दोस्रो टेस्टको पहिलो इनिङमा बिहीवार न्युजिल्याण्ड २ सय ५९ रन मै अल आउट भयो । भारतको पुनेस्थित महाराष्ट्र क्रिकेट एसोसिएसन स्टेडियममा न्युजिल्याण्डले टस जितेर ब्याटिङ रोजेको थियो।

न्युजिल्याण्डका लागि डेभोन कन्वेले सर्वाधिक ७६, रचिन रविन्द्रले ६५, मिचेल स्यान्टेनरले ३३, विल योंग र ड्यारेल मिचेलले समान १८ तथा कप्तान टम लाथमले १५ रन जोडे । एक समय १ सय ९७ रनमा ३ विकेट गुमाएर बलियो स्थितीमा रहेको न्युजिल्याण्डले ६२ रन जोड्दा बाँकी ७ विकेट गुमायो ।

भारतका लागि सुन्दरले २३.१ ओभरमा ५९ रन खर्चिएर ७ विकेट लिए । रविचन्द्रन आश्विनले ३ विकेट लिए । न्युजिल्याण्डको पछिल्लो ७ विकेट सुन्दरले नै लिएका थिए ।

आजै पहिलो इनिङको सुरुवात गरेको भारतले पहिलो दिनको खेल सकिदा १ विकेट गुमाएर १६ रन जोडेको छ । क्रिजमा यशस्वी जैसवाल र शुभमन गिल रहेका छन् । त्यसअघि कप्तान रोहित शर्मा टिम साउथीबाट डग आउट भएका थिए ।

भारतविरुद्धको पहिलो टेस्ट न्युजिल्याण्डले जितेको थियो ।