डालस, (हाम्रो खेलकुद) – नेपालले आईसीसी विश्वकप लिग-२ त्रिकोणात्मक सिरिजमा स्कटल्यान्डविरुद्ध सानदार बलिङ प्रदर्शन गरेको छ ।

ग्राण्ड प्रेरी क्रिकेट रंगशालामा टस हारेर पहिला ब्याटिङको निम्तो पाएको स्कटल्यान्डले २३.१ ओभरमा ५ विकेट गुमाउँदै ७३ रन बनाएको छ ।

स्कटल्यान्डका कप्तान रिची बेरिंग्टन र माइकल जोन्स समान १९ रनमा आउट भए । जोन्स आरिफ शेखको बलमा ठूलो सट खेल्ने धुनमा कप्तान रोहित पौडेलबाट २२ औं ओभरको चौथो बलमा क्याच आउट भए ।

लगत्तै अर्को ओभरमा गुल्सन झाको बलमा कट खेल्ने धुनमा रिची बेरिंग्टन आरिफ शेखबाट क्याच आउट भएपछि स्कटल्यान्ड २२.४ ओभरमा ७०-५ को दयनीय अवस्थामा पुगेको हो ।

स्कटल्यान्डको अन्तिम आशाको रुपमा म्याथ्यु क्रस र माइकल लिस्क क्रिजमा छन् । स्कटल्यान्डको सुरुवात नै राम्रो हुन सकेन ।

तीव्र गतिका बलर करण केसीले पहिलो ओभरको पाँचौं बलमा ओपनर चार्ली टिअरलाई स्कटल्यान्डले खाता नखोल्दै बोल्ड आउट गरेका थिए । दोस्रो विकेटका लागि एन्ड्रयु उमिद र ब्रेन्डनले २६ रनको साझेदारी गरेका थिए ।

सोमपाल कामीले आठौं ओभरको अन्तिम बलमा ओपनर एन्ड्रयू उमिदलाई १४ रनमा बोल्ड आउट गरे । उनले १९ बलमा ३ चौका हानेका थिए । पछिल्लो खेलमा अमेरिकाविरुद्ध ९८ रनको अविजित इनिङ खेलेका थिए ।

ब्रेन्डन म्याकमुलेन १२ औं ओभरको पाँचौं बलमा सन्दीप लामिछानेको बलमा १६ रनमा एलबीडब्लू आउट भए ।