काठमाडौं (हाम्रो खेलकुद)– अर्को महिना धनगढीमा आयोजना हुने सगरमाथा सिमेन्ट धनगढी प्रिमियर लिग (डिपिएल) क्रिकेटमा नयाँ संस्था हुने क्रम जारी रहेको छ । यसै सिलसिलामा डिपिएलमा रुस्लान क्रिकेट पनि पार्टरका रुपमा रहने भएको छ ।

सम्झौपत्रमा हस्ताक्षर गरेपछि डिसिएका अध्यक्ष सुवास शाही र रुस्लानका कानुनी विभागका प्रमुख गुरु अधिकारी । साथमा डिसिएका निर्देशक धिरेन्द्र शाही र रुस्लानका वित्त विभाग प्रमुख सतिश कर्ण ।

अब प्रतियोगिता सगरमाथा सिमेन्ट डिपिएल पावर्ड बाई जग शक्ति टिएमटी बार इन एसोसिएसन विथ रुस्लान भएको छ । धनगढी क्रिकेट एकेडेमी (डिसिए) का अध्यक्ष सुवास शाही र रुस्लानका कानुनी विभाग अधिकारी गुरु घिमिरेले सम्झौता पत्रमा बिहीबार हस्ताक्षर गरेका छन् । क्रिकेटलाई अझ योजनाबद्ध र व्यवसायिक हिसाबले अघि बढाउने उद्देश्यका डिसिए र सुदुरपश्चिमाञ्चल ऐकेडेमी (एसपिए) ले संयुक्त रुपमा चैत ४ देखि २९ गते सम्म डिपिएल आयोजना गर्ने यसअघि नै घोषणा गरिसकेको छ ।

विभिन्न शहरका टोलीहरुलाई फ्रेन्चाइज गरेर आयोजना गर्न लागिएको प्रतियोगिताका लागि पुस २३ गते खेलाडीको अक्सन भइसकेको छ । रकम बढाबढका आधारमा २ सय १७ खेलाडीको अक्सन गरिएको थियो । विभिन्न ६ शहरबाट टिम छनोट गरिएको र कप्तानको छनोट भने लक्की ड्र बाट गरिएको थियो । यसरी ज्ञानेन्द्र मल्ल सिवाइसी अत्तरियाको, शरद भेषावकर विरानगर किङ्सको, बसन्त रेग्मी काठमाडौं गोल्डेन्सको, शक्ति गौचन रुपन्देही च्यालेन्जर्सको, विनोद भण्डारी कञ्चनपुर आइकोनिकका र पारस खड्का टिम चौराह धनगढीको कप्तान चुनिएका थिए । छ कप्तानले समान १ लाख ५० हजार रुपैया पारिश्रमिक पाउनेछन् ।

२८ लाख ५० हजार पुरस्कार राशी रहेको प्रतियोगिताको विजेताले उपाधिसहित १५ लाख, दोस्रो हुने टोलीले ७ लाख रुपैयाँ प्राप्त गर्नेछ । नेपाली क्रिकेटमा यो अहिले सम्मकै सबैभन्दा ठुलो धनराशिको क्रिकेट प्रतियोगिता हो । प्रत्येक खेलका वेल्स क्याफे म्यान अफ द म्याचले १० हजार रुपैयाँ तथा म्यान अफ द सिरिजर्ले टिभीएस आरटिआर २०० अपाचे मोटरसाईकल पाउँनेछन् ।

 झन्डै १ करोड ६० लाख रुपैयाँ खर्च हुने अनुमान गरिर्एको प्रतियोगिता टि–ट्वान्टी प्रणालीमा खेलाइने बताइएको छ । लिग चरणमा प्रत्येक टिमले एकआपसमा एक–एक खेल खेल्ने छन् । शीर्ष चार टोली प्ले–अफमा पुग्नेछन् । त्यसमा पहिलो र दोस्रो हुने टिमको विजेता फाइनल पुग्नेछ । त्यसमा पराजित हुने टोलीले तेस्रो र चौथो हुने टिमसँग फाइनल प्रवेशका लागि प्रतिस्पर्धा गर्नेछ ।