सुबास हुमागाईं, काठमाडौं

सिद्धार्थ बैंक नेपाल प्रिमियर लिग अन्तर्गत चौथो खेलमा सुदूरपश्चिम रोयल्स र विराटनगर किंग्स खेल्दैछन् । विराटनगर आफ्नो दोस्रो खेल खेल्दा सुदूरपश्चिमले पहिलो खेल खेलिरहेको छ ।

लिगमा पहिलो खेल खेल्ने क्रममा सुदूरपश्चिमले ३ जना मात्र विदेशी खेलाडी आफ्नो प्लेइङ-११ मा उतारेको छ । न्युजिल्याण्डका स्कट कुगेलेइन, इंग्ल्यान्डका सेफ अली जेब र स्कटल्याण्डका ब्रान्डन मक्मलेन मात्र सुदूरको टोलीमा छन् । यूएईका रोहन मुस्तफा भने वैकल्पिक सूचीमा नै छन् ।

रोहनको उडानमा ढिलाई हुँदा उनले पहिलो खेल गुमाएका हुन् । क्यान स्रोतका अनुसार रोयल्सले मुस्तफा नआउने भएपछि ३ विदेशी खेलाडी मात्र उतार्न विशेष स्वीकृति अनुरोध गरेको थियो । एनपिएलको प्राविधिक समितिले स्थितिलाई ध्यानमा राख्दै स्वीकृति दिएको हो । मुस्तफा खेल सुरु हुनुभन्दा केहीबेर अघि नेपाल अवतरण भइसकेका छन् । उनको उडान विहान ८:२० मा ल्याण्ड भएको र टस हुने समयभन्दा अघि आउन नसक्दा खेल्न नपाएका हुन् ।

सुदूरले आज आइकोनिक खेलाडी वसन्त खत्रीलाई उतारेको छ । यस सिजनको एनपिएलमा ट्यालेन्ट हन्टबाट छनोट भएका खेलाडी उतार्ने सुदूर पहिलो खेलाडी हो । सुदूरपश्चिमका अर्जुन कुमाल र नरेन साउद पनि यू१९ टोलीसँग एसिया कप खेल्दैछन् ।

विराटनगरले भने आजको खेलमा दुई परिवर्तन गरेको छ । जनकपुरसँग हारबाट आकिब इल्यास र जितेन्द्र मुखियाको स्थानमा इस्मात आलम र दीपक बोहोरा खेल्दैछन् ।