काठमाडौं(हाम्रो खेलकुद) – सिद्धार्थ बैंक नेपाल प्रिमियर लिग(एनपिएल) मा बिहीवारको पहिलो खेलमा विराटनगर किंग्सले पोखरा एभेन्जर्सविरुद्ध टस जितेको छ ।

टियु क्रिकेट मैदानमा टस जितेर विरानगरका कप्तान सन्दीप लामिछानेले ब्याटिङ रोजेका हुन् ।

आजको खेलमा विजेता बन्ने टोलीले प्लेअफको झिनो सम्भावना कायमै राख्दा पराजित हुने टोली प्रतियोगिताबाट बाहिरिने दोस्रो टोली बन्नेछ ।

लुम्बिनी लायन्स बुधवार प्रतियोगिताबाट बाहिरिने पहिलो टोली बनेको थियो । पहिलो खेलमा चितवन र दोस्रो खेलमा जनकपुरसँग पराजित पोखराले तेस्रो खेलमा लुम्बिनीमाथि जित हात पारेको थियो । तर, पाँचौ खेलमा कर्णाली याक्ससँग हार बेहोरेको थियो ।

सुरुवाती दुवै खेल हारेको विराटनगरले तेस्रो खेलमा भने जित हात पारेकाे थियाे । विराटनगर पहिलो खेलमा जनकपुर बोल्ट्स र अर्कोमा सुदूरपश्चिमसँग पराजित भएको थियो । तेस्रोमा टोलीले लुम्बिनीलाई हराएको थियो । चौथो खेलमा कर्णालीसँग पराजित भएको थियो ।

मंगलवार कर्णाली याक्ससँग खेलेको पोखराको ३ टोलीमा परिवर्तन भएको छ । आकाश चन्द, दीलिप नाथ र म्याट क्रिट्ली बेन्चमा रहँदा किरण ठगुन्ना, तृत राज दास र जेन मल्लिकले खेलमा मौका पाएका छन् ।

पोखरा एभेन्जर्सको प्लेइङ-११

कुशल भुर्तेल, किरण ठगुन्ना, सागर ढकाल, दिनेश खरेल, माईकल लिस्क, नारायण जोशी, तृत राज दास, विपिन खत्री, आन्द्रेस गौस(विकेटकिपर), रेमन रिफर, जेन मल्लिक

शनिवार कर्णाली याक्ससँग खेलेको विराटनगरको टिममा २ परिवर्तन भएको छ । कर्णालीविरुद्ध खेलेका अकिब इल्यास र सुवास भण्डारी बेन्चमा रहँदा स्कट एडवार्डस् र अनिल खरेलले खेलमा मौका पाएका छन् ।

विराटनगर किंग्सको प्लेइङ-११

सन्दीप लामिछाने, लोकेश बम, मार्टिन गप्टिल, क्रिस सोल, निकोलस कीर्तन, प्रतिस जिशी, बसिर अहमद, दिपक बोहोरा, अनिल खरेल, नरेन भट्ट र स्कट एडवार्डस