काठमाडौं(हाम्रो खेलकुद) – सिद्धार्थ बैंक नेपाल प्रिमियर लिग (एनपिएल) को पहिलो संस्करण उपाधिका लागि शनिवार जनकपुर बोल्ट्स र सुदूरपश्चिम रोयल्सबीच प्रतिस्पर्धा हुँदैछ ।

कीर्तिपुरस्थित टियु क्रिकेट मैदानमा फाइनल दिउँसो १२ः३० बजे सुरु हुनेछ । लिग चरणमा शीर्ष स्थानमा रहँदै सुदूरपश्चिम र दोस्रोमा रहँदै जनकपुर प्ले अफमा पुगेको थियो ‌।

लिग र पहिलो क्वालिफायर दुवैमा जनकपुरमाथि सुदूरपश्चिम विजयी भएको थियो । एनपिएलमा यो दुई टोलीको भेट तेस्रो हुनेछ ।

विजेतालाई आकर्षक ट्रफीका भारी नगद पुरस्कार

पहिलो संस्करणको एनपिएल विजेताले आकर्षक ट्रफी सहित १ करोड १० लाख रुपैयाँ पाउँने छ । दोस्रो टोलीले ५१ लाख रुपैयाँ प्राप्त गर्नेछ । तेस्रो कर्णाली याक्सले २५ लाख र चौथो चितवन राइनोजले १५ लाख रुपैयाँ प्राप्त गर्नेछ ।

उपाधि जित्ने दुवै कप्तानको दाबी

फाइनल दुवै टोलीका कप्तानले आफूहरुले उपाधि जित्नेमा आशावादी रहेको बताए। सुदूरपश्चिमका कप्तान दीपेन्द्रसिंह ऐरीले आफुहरुले लिग चरण देखि अहिलेसम्म आउँदा राम्रो प्रदर्शन गरेको बताए । फाइनलमा पनि सोहि लयलाई निरन्तरता दिने प्रयास गर्ने उनको भनाई थियो।

‘हाम्रो प्रदर्शन कस्तो रह्यो तपाइहरु सबैले देख्नु भएको नै छ । आज पनि २ घण्टा अभ्यास गर्यौ,’ कप्तान ऐरीले भने ‘समग्रमा हाम्रो तयारी राम्रो नै रहेको छ । उपाधि जित्ने अन्तिम तयारीमा छौं ।’

खेलाडीहरु सबै जना लयमा रहेको कारण उपाधि जित्नेमा जनकपुरका कप्तान आसिफ शेख पनि ढुक्क देखिए ।

‘अहिलेसम्मका खेलहरु राम्रै भएको छ । फरक फरक विकेटमा खेल्दै लो स्कोरिङ र हाइ स्कोरिङ म्याचहरु खेलेका छौं,’ कप्तान आसिफले भने ‘सबै जना राम्रो लयमा देखिरहनु भएको छ । अब लास्ट १ गेम बाँकी रहेको छ । यसमा राम्रो प्रदर्शन गर्नेमा ढुक्क छौ ।’

जनकपुरमाथि सुदूरपश्चिम हाबी

लिग चरण र पहिलो क्वालिफायरमा जनकपुर र सुदूरपश्चिमले एक अर्काको सामना गरेका थिए । दुवै भेटमा सुदूरपश्चिमले जनकपुरमाथि सहज जित हात पारेको थियो । लिग चरणको १८औं खेलमा सुदूरपश्चिम र जनकपुर आमनेसामने भएका थिए । लिग चरणको खेलमा सुदूरपश्चिमले जनकपुरलाई ७२ रनको फराकिलो हार चखाएको थियो ।

सुदूरपश्चिमले दिएको १ सय २४ रनको लक्ष्य पछ्याउने क्रममा जनकपुर ५१ रनको झिनो स्कोरमा समेटिएको थियो । लिग चरणमा शीर्ष दुईमा रहेका यि दुवैले पहिलो क्वालिफायर खेलेका थिए । बुधवारको पहिलो क्वालिफायरमा यि आमनेसामने भएका थिए । पहिलो क्वालिफायरमा पनि जनकपुरमाथि हाबी सुदूरपश्चिमले ८ विकेटको फराकिलो जित हात पारेको थियो ।

पहिलो क्वालिफायर जित्दै सुदूरपश्चिमले सिधै फाइनल यात्रा तय गरेको थियो । जनकपुर भने दोस्रो क्वालिफायरको बाटो हुँदै फाइनलसम्म पुगेको हो । दोस्रो क्वालिफायरमा जनकपुरले इलिमिनेटको विजेता कर्णाली याक्समाथि २ विकेटको कठिन जित हात पारेको थियो ।

एनपिएलको एल क्लासिको भिडन्त

एनपिएलमा समर्थकका हिसाबले जनकपुर र सुदूरपश्चिमबीचको खेललाई एल क्लासिको भिडन्तका रुपमा लिइन्छ । एनपिएलको टिमहरुमा फ्यानबेसमा जनकपुर र सुदूरपश्चिम अगाडि छन् । यि दुईबीचको उपाधी भिडन्तले मैदान तातिने नै छ । त्यो भन्दा बढी मैदान बाहिर तातोपन देखिने पक्का छ ।

दुवै टोलीको सम्भावित प्लेइङ-११

जनकपुरका नियमित कप्तान अनिल शाहको अनुपस्थितीले टोलीको केही सन्तुलन बिग्रेको छ । यद्यपी टोलीमा विकल्प छ । जनकपुरले फाइनल खेलमा पनि दोस्रो क्वालिफायरमा खेलाएको सेट नै मैदान उतार्ने सम्भावना छ ।

जनकपुर बोल्ट्सको सम्भावित प्लेइङ-११

आकाश त्रिपाठी, आसिफ शेख, लाहिरु मिलान्था(विकेटकिपर), हर्ष ठाकर, जेमी निशम, शुभ कसांकार, मोहम्मद मोहसिन, शेर मल्ल, मयन यादव, किशोर महतो र ललित राजवंशी।

कप्तान दीपेन्द्रसिंह ऐरी लगायत धेरै आफ्नै क्षेत्रका खेलाडीलाई टोलीमा राखेको सुदूरपश्चिम प्रतियोगिताको बलियो टोलीका रुपमा फाइनल पुगेको छ । सुदूरपश्चिमले पनि पहिलो क्वालिफायरमा जनकपुरविरुद्ध खेलेको टिमलाई निरन्तरता दिने सम्भावना छ ।

सुदूरपश्चिम रोयल्सको सम्भावित प्लेइङ-११

दीपेन्द्रसिंह ऐरी, हर्मित सिंह, विनोद भन्डारी(विकेटकिपर), ब्रेन्डन मक्मेलन, सेफ जेब, आरिफ शेख, इशान पान्डे, स्कट कुगेलेन, नरेन साउद, अभिनाष बोहोरा र नरेश बुढाऐर।

कार पाउने नेपाली खेलाडी को बन्लान्

एनपिएलको उपाधिसँगै कुन नेपाली खेलाडी कार जित्ला भन्ने चासो पनि दर्शकमा रहेको छ ।

सुदूरपश्चिम रोयल्सका कप्तान दीपेन्द्रसिंह ऐरी, जनकपुर बोल्ट्सका बलर ललितनाराण राजवंशी तथा लुम्बिनी लायन्सका कप्तान रोहितकुमार पौडेललाई‌ कारको मुख्य दाबेदारका रुपमा हेरिएको छ।