काठमाडौं (हाम्रो खेलकुद) – अल्टिमेट इन्डोर्स प्रा.लि. र पाण्डा इभेन्ट्सको आयोजनामा जारी अन्तर कलेज सुपर क्रिकेट प्रतियोगिताको क्वार्टरफाइनलका खेलहरु पुरा भएका छन ।
प्रतियोगिताको पहिलो क्वार्टरफाइनलमा त्रिभुवन विश्वविद्यालय चिकित्सा शास्त्रलाई ५० रनले हराउदै काठमाडौं कलेज अफ म्यानेजमेन्ट सेमिफाइनल प्रवेश गरेको छ भने दोस्रो क्वार्टरफाइनलमा कौस्तुभ कलेजलाई पाखा लगाउदै राजश्रीले अन्तिम ४ मा स्थान पक्का गरेको हो । समुह चरणमा तीन खेल जित्दै अन्तिम ८ मा पुगेको कौस्तुभले राजश्रीको ब्याट्सम्यानहरुलाई रोक्न नसक्दा ७७ रनको पराजय भोग्दै प्रतियोगिताबाट बाहिरियो ।
तेस्रो क्वार्टरफाइनलमा ट्रीटन कलेजले समृद्धी कलेजलाई ६१ रनले पछि पार्यो । दिनको अन्तिम खेलमा पेन्टागन कलेजले कसमस बिरुद्ध फराकिलो जित हासिल गर्दै सेमिफाइनलमा स्थान पक्का गर्यो । १८ ओभरमा १८१ रनको बिशान योगफल तयार गरेको पेन्टागनले कसमसलाई ३८ रनको झिनो स्कोरमा रोक्दै १४३ रनको जित हासिल गरेको हो ।
मंगलबार हुने प्रतियोगितको सेमिफाइनलमा काठमाडौं कलेज अफ म्यानेजमेन्टले राजश्रीको सामना गर्नेछ भने पेन्टागन कलेज र ट्रीटोन आमने सामने हुनेछन्। फाइनल खेल पनि मंगलबारनै हुने कार्यक्रम रहेको छ।
