काठमाडौं (हाम्रो खेलकुद)– रोमाञ्चक फाइनलमा राजश्री जनक कलेजलाई १३ रनले हराउँदै पेन्टागन कलेजले मंगलबार अल्टिमेट अन्तर कलेज इन्डोर  क्रिकेट प्रतियोगिताको उपाधि जितेको छ । पेन्टागनले उपाधिसहित १ लाख रुपैयाँ प्राप्त गरेको छ ।

टस जितेर पहिले ब्याटिङ रोजेको पेन्टागनले निर्धारित १८ ओभरमा १ सय २९ रन जोडेको थियो । १ सय ३० रनको लक्ष्यलाई रक्षा गर्दै पेन्टागनले राजश्री लाई १ सय १६ मा रोक्न सफल भएको थियो । पेन्टागनका लागी २६ रन जोड्नुका साथै१ विकेट पनि लिएका दिपेन्द्र मैनाली फाइनलको म्यान अफ द म्याच भए ।

त्यसअघि फाइनलमा स्थान सुरक्षित बनाउन पेन्टागनले आजै भएको दोस्रो सेमिफाइनलमा १ सय ८४ रन जोडेको थियो । १ सय ८६ रनको लक्ष्य पछ्याएको ट्रिटोनले बीचमै खेल छाडेपछि पेन्टागन स्वतः फाइनल पुगेको थियो । त्यस्तै पहिलो सेमिफाइनलमा राजश्रीले काठमाडौं कलेज अफ म्यानेजमेन्टलाई ३२ रनले पाखा लगाउदै फाइनलको यात्रा तय गरेको थियो ।

फाइनलमा म्यान अफ द म्याच बनेका दिपेन्द्र प्रतियोगिताको सर्वोत्कृष्ट खेलाडी समेत घोषित भए । प्रतियोगिताका दुई अलग खेलमा ५ विकेट लिन सफल कौस्तुभ कलेजका प्रकाश बिष्ट उत्कृष्ट बलर र पेन्टागनका नरेश बुढायर उत्कृष्ट ब्याट्सम्यान चुनिए ।