एजेन्सी – पाकिस्तानले झन्डै तीन दशक पछि अन्तर्राष्ट्रिय क्रिकेट परिषद(आइसिसी) को प्रतियोगिता आयोजना गर्दै छ ।

पाकिस्तानले सन् १९९६ मा ओडिआई विश्व कपपछि पहिलो पटक कुनै आइसिसीको प्रतियोगिता आयोजना गर्न लागेको हो । त्यो हो च्याम्पियन्स ट्रफी ।

साविक विजेता समेत रहेको पाकिस्तानले बुधवार सुरु हुने च्याम्पियन्स ट्रफीको आयोजना गर्न लागेको हो । केहि खेल‌ भने युएईमा हुनेछन्।

सन् १९९६ मा ओडिआई विश्व कप पाकिस्तान, भारत र श्रीलंकाले संयुक्त रुपमा आयोजना गरेका थिए । त्यसपछि आइसिसीको कुनै पनि प्रतियोगिता पाकिस्तानमा भएको छैन।

च्याम्पियन्स ट्रफी खेल्न भारत पाकिस्तान नजाने भए पछि प्रतियोगिताका केही खेल भने युएईमा आयोजना हुनेछ । भारतले खेल्ने सबै खेल युएईमा हुनेछ ।

भारतमा आयोजना भएको सन् २०२३ को ओडिआई विश्व कपको शीर्ष ८ राष्ट्र च्याम्पियन्स ट्रफीमा खेल्दैछन् । सहभागी टोली दुई समूहमा विभाजन गरिएको छ । पाकिस्तान, भारत, बंगलादेश तथा न्युजिल्याण्ड समूह ए मा रहेका छन् ।

अस्ट्रेलिया, अफगानिस्तान, इङ्ग्ल्याण्ड र दक्षिण अफ्रिका समूह बी मा रहेका छन् । हरेक समूहका शीर्ष २ टोली सेमिफाइनलमा प्रवेश गर्नेछन् ।

दुई सेमिफाइनलको विजेता उपाधिका लागि खेल्नेछन् । यस संस्करणको च्याम्पियन्स ट्रफीको फाइनल खेल ९ मार्चमा रहेको छ ।

भारतले फाइनल खेल्ने भएमा फाइनल युएईमा हुनेछ । त्यसबाहेकको अवस्थामा फाइनल पाकिस्तानमा हुनेछ । पाकिस्तानले बुधवार न्युजिल्याण्डको सामना गर्दै प्रतियोगिता सुरुवात गर्नेछ ।