काठमाडौं (हाम्रो खेलकुद)- किरण ठगुन्नाको शतकमा सुदूरपश्चिम प्रदेशले प्रधानमन्त्री कप पुरुष एकदिवसीय राष्ट्रिय क्रिकेट प्रतियोगितामा आज कोशी प्रदेशलाई ३१ रनले हराएको छ।

जितको लागि २ सय ४३ रनको विजय लक्ष्य पछाएको कोशी प्रदेश ४५.१ ओभरमा सम्पुर्ण विकेट गुमाउँदै २ सय ११ रनमा समेटियो।

ओपनर सोनु अन्सारी बिना कुनै रन आउट भए। त्यसपछि सकिब हक र आयिश भट्टराईले दोस्रो विकेटको लागि ८३ रनको साझेदारी गरे। आयिश ३६ रन जोडेर रन आउट भए।

त्यसपछि ठुलो साझेदारी बन्न सकेन। सकिबले सर्वाधिक ६२ रन बनाए। कप्तान अंकित सुवेदी र समिर कार्कीले समान ३८ रन जोडे।

यी बाहेक अन्य खेलाडी सस्तो रनमा समेटिए। बलिङमा सौर्य श्रेष्ठले ३ र भोजराज भट्टले २ विकेट लिए।

त्यसअघि देउखुरी अन्तराष्ट्रिय स्टेडियममा पहिले ब्याटिङ गरेको सुदुर ४३.४ ओभरमा २ सय ४२ रन बनाउँदै अल आउट भएको थियो।

३४ रन जोड्दा ३ विकेट गुमाइसकेको सुदुरले सुरुवात राम्रो गर्न नसके पनि छैटौं क्रमका किरण ठगुन्नाले सानदार पारी खेले। उनले शतकीय पारी खेले।

किरणले ८१ बलमा ११ चौका र ४ छक्का प्रहार गर्दै सानदार शतक प्रहार गरे। जुन टिमको जितको प्रमुख आधार पनि बन्यो। उनी १ सय १५ रन जोडेर फिर्दोश अन्सारीको बलमा आउट भए।

अन्यले उल्लेख्य रन बनाउन सकेनन्। कोशीले ३२ रन एक्स्ट्रा दिएको थियो। बलिङमा ज्ञानेन्द्र श्रेष्ठले ९ ओभर ४ बल बलिङ गर्दै १ मेडन सहित ४८ विकेट खर्चेर ४ विकेट झारे। फिर्दोश अन्सारी र अंकित सुवेदीले समान २ विकेट लिए।

सुदूरपश्चिमको यो तेस्रो जित हो। जितका बाबजुद सुदूरपश्चिम फाइनलको दौडबाट बाहिरिसकेको छ। उसले ८ खेलबाट ६ अंक बनाएको छ। कोशीको यो सातौं हार हो। उसँग मात्र २ अंक रहेको छ।