काठमाडौं(हाम्रो खेलकुद) – एपिएफले तेस्रो स्थानमा प्रधानमन्त्री(पिएम) कप पुरुष एकदिवसीय राष्ट्रिय क्रिकेट प्रतियोगिताको अन्त्य गरेको छ।

लोकेश बमको विष्फोटक इनिङकोमा लिगको आफ्नो अन्तिम खेलमा एपिएफ क्लबले कोशी प्रदेशलाई २ विकेटले हराएको छ।

अर्का दुई टोली नेपाल पुलिस क्लब र त्रिभुवन आर्मी क्लबले पिएम कपको फाइनल खेल्ने पक्का हुँदा एपिएफ तेस्रो भएको छ। पुलिस र आर्मीबीच लिग कै खेल हुन बाँकी छ । त्यो खेलमा पराजित आर्मी दोस्रो स्थानमा रहनेछ।

पुलिसको १६ अंक छ भने आर्मी र एपिएफको समान १४ अंक छ । हेड टु हेडमा आर्मी अगाडि छ। एपिएफ गत वर्ष शीर्ष चारमा पर्न असफल भएको थियो।

२ सय ५५ रनको लक्ष्य एपिएफले ४४.४ ओभरमा ८ विकेट गुमाएर पूरा गर्यो । लोकेशले अविजित रहँदै ५४ बलमा समान ६ चौका र छक्कासहित सर्वाधिक ८४ रन जोडे।

१ सय ६४ रनमा ८ विकेट गुमाएर हार नजिक पुगेको एपिएफको जितमा नवौं विकेटका लागि इर्शाद अहमदसँग मिलेर लोकेशले ९४ रनको साझेदारी गर्दै खेलमा जित दिलाए ।

इर्शादले ४० बलमा नट आउट १६ रन जोडे । कप्तान रोहित पौडेलले ७३ बलमा ६ चौकाको सहयोगमा ६१ रन बनाए । सन्दीप जोरा २५ बलमा ४ चौकाको सहयोगमा ३० रन जोड्दै आउट भए ।

कोशीको लागि दिपेश कंडेल र फिर्दोश अन्सारीले समान ३ तथा भुपाल लुइटेल र ज्ञानेन्द्र श्रेष्ठले समान १ विकेट लिए ।

त्यसअघि भैरहवाको‌सिद्धार्थ क्रिकेट मैदानमा टस जितेर ब्याटिङ गरेको कोशी ५० ओभरमा सबै विकेट गुमाएर २ सय ५४ रन जोडेको थियो ।

टोलीका साकिब हकले ६३ बलमा ११ चौकाका साथ सर्वाधिक ६८ रन जोडे । कप्तान अंकित सुवेदी २३ बलमा ४ चौका र १ छक्काको सहयोगमा ३५ रन बनाए ।

सुजन थपलिया ५७ बलमा ३३, अइष भट्टराई ५७ बलमा ३४, ओपनर चिराग साह ४८ बलमा २४ रनमा आउट भए ।

एपिएफका लागि मौषम ढकाल र अभिषेक गौतमले समान ३, कप्तान रोहितले २, इर्शाद र अमरसिंह राउटेलाले समान १ विकेट लिए ।

कोशीले ९ खेलमा २ अंक मात्र जोडेर पुछारमा रहँदै पपिएम कपको अन्त्य गरेको छ ।