सुमन अधिकारी,बुटवल

रुपन्देही र दाङ जिल्ला बिहीवार लुम्बिनी प्रदेश स्तरीय टि ट्वान्टी क्रिकेट प्रतियोगिताको संयुक्त विजेता बनेका छन्।

बुधवार राति परेको पानीले पिच र आउट फिल्ड भिजेपछि खेल हुन नसक्दा दाङ र रुपन्देहीलाई संयुक्त विजेता घोषित गरिएको हो।

फाइनल लमही– ५ स्थित देउखुरी अन्तर्राष्ट्रिय क्रिकेट रंगशालामा खेल हुने तय भएको थियो ।

देउखुरीमा खेल्न नसक्ने भएपछि घोराही– १७ गुलरियास्थित घोराही क्रिकेट रंगशालामा पिच तयारी गर्ने प्रयास भएपनि पुनः पानी परेपछि अन्ततः दाङ र रुपन्देहीलाई संयुक्त विजेता घोषणा गरिएको हो ।

संयुक्त विजेता बनेका रुपन्देही र दाङले समान ७५ हजार रुपैयाँसहित ट्रफी प्राप्त गरे। विजेतालाई लुम्बिनी प्रदेशका स्वास्थ्य मन्त्री खेमबहादुर सारुले कप, शिल्ड तथा पुरस्कार वितरण गरे ।

सेमिफाइनलमा दाङले कपिलवस्तुलाई ६ विकेटले र रुपन्देहीले बर्दियालाई ७ विकेटले पराजित गरेको थियो । प्रतियोगिताको प्लेयर अफ द सिरिज र उत्कृष्ट ब्याटर दाङका तुलबहादुर थापा भए ।

प्ले अफ दि सिरिजको १० र उत्कृष्ट ब्याटरको ५ गरि तुलबहादुरले १५ हजार रुपैयाँ सहित ट्रफी प्राप्त गरे । गुल्मीका रामचन्द्र टण्डन उत्कृष्ट बलर चुनिए र ५ हजार रुपैयाँसहित ट्रफी हात पारे ।

प्रदेशका ११ जिल्लाको सहभागितामा चैत २५ गते सुरु प्रतियोगिताको समापनको अध्यक्षता लुम्बिनी प्रदेश खेलकुद परिषदका सदस्य सचिव तिरनदाज गौतमले गरे ।

लुम्बिनी प्रदेश खेलकुद परिषदले आयोेजना गरेको प्रतियोगिताको दाङ जिल्ला क्रिकेट संघले प्राविधिक सहयोग र व्यवस्थापन गरेको थियो।