काठमाडौं (हाम्रो खेलकुद)- नेपालले आईसीसी विश्वकप लिग २ त्रिकोणात्मक सिरिजमा स्कटल्याण्डविरुद्ध आफ्नो ओडिआई इतिहासकै उच्च योगफल बनाएको छ ।

आइतवार राति घरेलु टोली स्कटल्याण्डले दिएको ३ सय २४ रनको लक्ष्य पछ्याउने क्रममा नेपालले ५० ओभरमा अल आउट हुँदै ३ सय २१ रन बनायो ।

यसअघि नेपालको ओडिआईको उच्च योगफल ३ सय १० रन थियो । नेपालले ओडीआईमा दोस्रो पटक मात्रै ३ सय रन कटाएको हो ।

ओमानविरुद्ध त्यो योगफल नेपालले सन् २०२३ अप्रिलमा एसिसी प्रिमियर कपमा ५० ओभरमा ८ विकेट गुमाउँदै ३ सय १० रन जोडेको थियो । कुशल मल्लले ६४ बलमा ९ चौका र १० छक्कासहित १ सय ८ रनको शतकीय इनिंङ खेलेका थिए ।

स्कटल्याण्डविरुद्ध ऐतिहासिक जित नजिक पुगेको नेपाल अन्तिम ओभरमा चुकेको थियो । नेपाललाई अन्तिम ६ बलमा जित्नलाई मात्रै ७ रन चाहिँदा २ विकेट थियो ।

तीव्र गतिका बलर शफ्यान शरिफको बाउन्सर बलमा करण केसी तेस्रो बलमा आउट भएपछि जितेका लागि बाँकी ३ बलमा ५ रन चाहिँएको थियो । शरिफले त्यसपछि एक एक रन दिए । अन्तिम बलमा ३ रन चाहिँदा योर्करमा ललित राजवंशीलाई बोल्ड गर्दै नेपालको जित खोसेका थिए ।

नेपालका भीम सार्कीले ७३, दीपेन्द्रसिंह ऐरीले ५६ र सोमपाल कामीले ६७ रन जोडेका थिए । स्कटल्यान्डका डेब्यू खेलाडी म्याकेन्जी जोन्सले ३, शफ्यान शरिफ र माइकल लिस्कले समान २ विकेट लिए ।

त्यसअघि फोर्थहिल डुन्डीमा टस जितेर पहिला ब्याटिङ रोजेको स्कटल्याण्डले ५० ओभरमा ६ विकेट गुमाउँदै ३ सय २३ रन जोडेको थियो । कप्तान रिची बेरिंग्टनले १ सय २ रन, चाल्र्स टियरले ६८ र माइकल लिस्कले ९६ रन जोडेका थिए ।

लिस्कले तल्लोक्रममा ६२ बलमा १२ चौका र ३ छक्कासहित उक्त अविजित इनिङ खेलेपछि विशाल योगफल बनाएको थियो । नेपालका करण र दीपेन्द्रले समान २ विकेट लिए ।

स्कटल्यान्ड भ्रमणमा यसअघि सुरुवाती दुई खेलमा नेपाल विजयी थियो । पहिलो खेलमा स्कटल्यान्डलाई एक विकेट र नेदरल्याण्डलाई ५ विकेटले हराएको थियो ।

लिग २ मा नेपालले मंगलबार नेदरल्याण्ड्ससँग खेल्नेछ । नेपाल लिग-२ मा १५ खेलमा ४ जितसहित १० अंकका साथ सातौं स्थानमा छ ।

सन् २०२६ सम्म कुल ३६ खेल खेल्दा ८ देश सहभागी यस लिग २ मा शीर्ष चारमा रहन सके सोझै विश्वकप छनोट खेल्न पाउनेछ । अन्यथा प्लेअफ खेल्नुपर्ने हुन्छ ।