काठमाडौं(हाम्रो खेलकुद) – पाँचपोखरी क्रिकेट प्रतियोगितामा आयोजक टोली र पाँचपोखरी हिमालयन क्रिकेट क्लबले विजयी सुरुवात गरेका छन् ।

प्रतियोगिताको पहिलो खेलमा मंगलवार पाँचपोखरी क्रिकेट क्लबले द मिग्ते साँगाचोक क्लबलाई ६३ रनले पराजित गर्यो । १ सय ३६ रनको लक्ष्य पछ्याएको साँगाचोकले १६.४ ओभरमा ७२ रनमा सबै विकेट गुमायो ।

साँगाचोकका लागि सुमन चौलागाईं र प्रतिक श्रेष्ठले समान १३ रन बनाए भने अन्य ब्याटरले दोहोरो अंकमा रन जोड्न सकेनन् ।

पाँचपोखरीका कप्तान सार्थक धितालले २ तथा विजयकुमार धिताल, भुवन खड्का, रोशन विक, मनोज खड्का तथा निशान्त धितालले समान १ विकेट लिए ।

त्यसअघि त्रिवि क्रिकेट मैदानमा टस जितेर ब्याटिङ गरेको पाँचपोखरीले निर्धारित २० ओभरमा १० विकेट गुमाएर १ सय ३५ रनको योगफल तयार गर्यो ।

पाँचपोखरीका रोशन विकले ४८ तथा बुद्धि तामाङले ३९ रन जोडे । साँगाचोकका लागि सुमन चौलागाईंले ४ तथा मनिष पराजुली, उद्धब तिमिल्सिना र निकेश श्रेष्ठले समान १ विकेट लिए ।

यस्तै आजै भएको अर्को खेलमा पाँचपोखरी हिमालयन क्लबले साँगाचोक युथ क्लबलाई १ विकेटले पराजित गर्यो । १ सय ४ रनको लक्ष्य हिमालयनले १९.१ ओभरमा ९ विकेट गुमाएर पूरा गर्यो ।

हिमालयनका लागि कर्मा तामाङले २१ तथा सानी तामाङले १४ रन जोडे । साँगाचोकका रित गौतमले ३, सौरव सखाकर्मी र रवि श्रेष्ठले समान २ तथा राज नेपालीले १ विकेट लिए ।

त्यसअघि टस हारेर पहिले ब्याटिङ गरेको साँगाचोकले १७.१ ओभरमा सबै विकेट गुमाएर १ सय ३ रन जोडेको थियो । साँगाचोकका लागि सौरब सखाकर्मीले ७४ रन बनाउँनु बाहेक अन्यले दोहारो अंकमा रन बनाउँन सकेनन् ।

हिमालयनका लागि अभिनास तामाङ र सनी तामाङले समान ३ तथा कप्तान दावा लामा र पेम्बा तामाङले समान १ विकेट लिए ।