काठमाडौं (हाम्रो खेलकुद) – द माइटी साँगाचोक क्लब क्लब र मेलम्ची नगरपालिकाले सिन्धुपाल्चोक जिल्लास्तरीय पाँचपोखरी ट्वान्टी–२० क्रिकेट प्रतियोगितामा विहीबार जित दर्ता गरेका छन् ।

त्रिवि क्रिकेट मैदानमा सम्पन्न समूह ‘ए’ अन्तर्गतको खेलमा माइटी साँगाचोकले साँगाचोक युथ क्लबविरुद्ध आठ विकेटको सहज जित निकाल्यो । साँगाचोकले प्रस्तुत गरेको ९७ रनको लक्ष्य माइटी साँगाचोकले ११.४ ओभरमा दुई विकेट गुमाउँदै पूरा गर्यो ।

माइटी साँगाचोकका लागि आशोक पौडेलले ३७ बलमा चार छक्का र तीन चौकाको मद्दतले सर्वाधिक ५६ रनको योगदान गरे ।टस जितेर ब्याटिङ रोजेको साँगाचोकले निर्धारित २० ओभरमा सबै विकेट गुमाउँदै ९६ रनको योगफल तयार पारेको थियो ।

साँगाचोकका लागि रित गौतमले ३६, कप्तान दिनेश श्रेष्ठले १९ र पारश पुरीले १३ रन बनाउनुबाहेक अन्य ब्याटरले दोहोरो अंकमा रन जोड्न सकेनन् । माइटी साँगाचोकका लागि उत्सव तिमल्सिनाले तीन, सुमन चौलागाईं र मनिष पराजुलीले समान दुई तथा नवीन सापाकोटाले एक विकेट लिए ।

जितसँगै माइट तीन खेलमा चार अंक जोडेको माइट साँगाचोक शीर्ष स्थानमा छ । परासिजत साँगाचोक समान खेलबाट एक अंकका साथ पुछारमा छ ।

मेलम्चीले समूह ‘बी’मा सुखद सुरुवात गर्ने क्रममा भोटेचौर स्पोर्टस क्लबलाई २३ रनले हराएको छ । मेलम्चीले प्रस्तुत गरेको १४७ रनको लक्ष्य पछ्याएको भोटेचौर १९.२ ओभरमा १ सय २३ रनमा समेटियो ।

भोटेचौरका लागि दुर्गेश थापाले ३७, कप्तान राजेश चौलागाईँले २६, निश्चल थापाले १९ र सुमित झाले १४ रन बनाए ।

त्यसअघि टस जितेर ब्याटिङको निम्तो पाएको मेलम्चीले १८. ५ ओभरमा सबै विकेट गुमाउँदै १४७ रनको योगफल तयार पारेको थियो ।

मेलम्चीका लागि प्लेयर अफ द म्याच बनेका उत्तम थापामगरले २८ बलमा सात छक्का र दुई चौकाको मद्दतले सर्वाधिक ५९ रनको योगदान गरे । यसैगरी रिन्जिङ लामाले ४५ रन बनाउँदा अन्य ब्याटरले दोहोरो अंकमा रन जोड्न सकेनन् ।

पाँचपोखरी थाङपाल गाउँपालिकाको आयोजनामा जारी प्रतियोगितामा सात टोलीले प्रतिस्पर्धा गरिरहेका छन् ।