एजेन्सी – नेदरल्यान्ड्सले आईसीसी विश्वकप लिग-२ मा घरेलु टोली स्कटल्याण्डमाथि ४ विकेटको कीर्तिमानी जित हात पारेको छ । जित्नलाई ३ सय ७० रनको विशाल लक्ष्य नेदरल्यान्ड्सले ४९.२ ओभरमा ६ विकेट गुमाउँदै पूरा गर्यो ।

नेदरल्यान्ड्सका ओपनर म्याक्स ओडाउडले १३० बलमा १३ चौका र ४ छक्कासहित १ सय ५८ रनको अविजित इनिङ खेले । उनको यो ओडीआई करिअरको पहिलो शतक हो । उनी नेदरल्यान्ड्सबाट ओडीआईमा एकै खेलमा सर्वाधिक रन बनाउने ब्याटरर बनेका छन् । उनले वेस्ली ब्यारेसीले २०१४ मा केन्याविरुद्ध बनाएको १ सय ३७ रनको अविजित इनिंगको कीर्तिमान तोडेका हुन् ।

सन् २००६ मा दक्षिण अफ्रिकाले अष्ट्रेलियाविरुद्ध पूरा गरेको ४ सय ३५ रनपछि यो ओडीआई इतिहासकै ठूलो सफलतापूर्वक रन पूरा हो । म्याक्स बाहेक नेदरल्यान्ड्सका माइकल लेभिटले ४४, कप्तान स्कट एडवार्ड्सले ३२, वेस्ली ब्यारेसी १५, तेजा निणामानिरु ५१ र नोहा क्रसले ५० रनको योगदान दिए ।

स्कटल्यान्डका शफ्यान शरिफले ३, म्याकेन्जी जोन्स र मार्क वाटले १-१ विकेट लिए ।

त्यसअघि डण्डीमा टस जितेर पहिला ब्याटिङ रोजेको स्कटल्यान्डले ५० ओभरमा ६ विकेट गुमाउँदै ३ सय ६९ रन बनाएको थियो ।

स्कटल्यान्डका ओपनर जर्ज मुन्शेले १५० बलमा १४ चौका र ११ छक्कासहित १ सय ९१ रनको कीर्तिमानी इनिङ खेले । तीव्र गतिका बलर भिभियन किंग्माको बलमा बोल्ड भएपछि उनी दोहोरो शतक पूरा गर्ने पहिलो एसोसिएट क्रिकेटर बन्न ९ रनले चुकेका थिए ।

स्कटल्यान्डका चार्ली टियर २३, ब्रेन्डन म्याकमुलेन २१, लियाम १४, म्याथ्यु क्रस ५९ र माइकल लिस्कले २९ रन जोडे । माइकल लेभिट र अर्यान दत्तले २-२ तथा भिभियन किंग्मा र रोेलेफ भान डर मर्वेले १-१ विकेट लिए ।

यस त्रिकोणात्मक सिरिजमा यसअघि नेदरल्यान्ड्स नेपालसँग १६ रन र ५ विकेट तथा स्कटल्याण्डसँग ४४ रनले पराजित भएको थियो । उता स्कल्यान्ड नेपालसँग पहिलो खेलमा १ विकेटले पराजित हुँदा दोस्रोमा २ रनले विजयी भएको थियो । यी तीन टोलीबीच अव टी२० आई त्रिकोणात्मक सिरिज हुनेछ । पहिलो खेल आइतबार स्कटल्याण्ड र नेदरल्यान्ड्सबीच हुनेछ ।