काठमाडौं (हाम्रो खेलकुद) – पाँचपोखरी थाङपाल गाउँपालिका र सिन्धुपाल्चोक जिल्ला क्रिकेट संघको संयुक्त आयोजनामा जारी जिल्ला स्तरीय पाँचपोखरी टि२० क्रिकेट प्रतियोगिताको सेमिफाइनल समीकरण पूरा भएको छ ।

कीर्तिपुरस्थित त्रिवि क्रिकेट मैदानमा समूह ‘ए’ बाट पाँचपोखरी क्रिकेट क्लब र द माइटी साँगाचोक क्लब तथा समूह ‘बी’बाट मेलम्ची नगरपालिका र भोटेचौर स्पोर्टस क्लबले अन्तिम चारको यात्रा तय गरे ।

शनिबार सम्पन्न समूह चरणको अन्तिम खेलमा अलराउन्डर सोनु देवकोटाले उत्कृष्ट प्रदर्शन गरेपछि मेलम्ची नगरपालिकाले हेलम्बु गाउँपालिकाविरुद्ध सात विकेटको जित निकाल्दै समूह विजेता बन्यो । बलिङमा ७ विकेट लिएका सोनुले ब्याटिङतर्फ पनि नटआउट ४१ रन जोडे ।

विगतमा सिन्धुपाल्चोकका खेलाडीले मात्र सहभागिता जनाउन पाउने प्रावधान रहेपनि यसपटक भने केही लचकता अपनाइएको हो । यस संस्करणबाट बागमती प्रदेशबाट विभिन्न उमेर समूहमा प्रतिनिधित्व गरेर प्रदेश र अन्तर्राष्ट्रिय प्रतियोगितामा सहभागिता जनाएका २ खेलाडीलाई टिममा समावेश गर्न पाइने प्रावधान थियो । सोनु त्यसै नियमअनुसार मेलम्चीको टिममा जोडिएका हुन् ।

हेलम्बुले प्रस्तुत गरेको ७६ रनको लक्ष्य मेलम्चीले ११.१ ओभरमा तीन विकेट गुमाउँदै पूरा गर्यो । मेलम्चीका लागि सोनु देवकोटाले अविजित ४१, विनोद तामाङले अविजित २१ र कप्तान रिन्जिङ लामाले ११ रन बनाए । हेलम्बुका लागि विनोद तामाङले दुई र कृष कार्कीले एक विकेट लिए ।

त्यसअघि टस हारेर ब्याटिङ रोजेको हेलम्बुले १५.१ ओभरमा सबै विकेट गुमाउँदै ७५ रनको योगफल तयार पारेको थियो । हेलम्बुका लागि विवेक तामाङले ३२ र विनोद तामाङले २४ रन बनाउनुबाहेक अन्य ब्याटरले दोहोरो अंकमा रन जोड्न सकेनन् ।

मेलम्चीका लागि सोनु देवकोटाले चार ओरभरमा १२ रन खर्चिएर सर्वाधिक सात विकेट लिए । यसैगरी रिन्जिन लामाले दुई र उत्तम थापामगरले एक विकेट हात पारे ।

प्रतियोगिता अन्तर्गत आइतबार विहान ९ बजे हुने सेमिफाइनलमा पाँचपोखरी क्रिकेट क्लब र भोटेचौर स्पोर्टस क्लब भिड्द दोस्रो सेमिफाइनलमा दिउँसो १ बजे मेलम्ची नगरपालिका र द माइटी साँगाचोकले प्रतिस्पर्धा गर्नेछन् ।

प्रतियोगिताको विजेताले १ लाख रुपैयाँ र उपविजेताले ५० हजार प्राप्त गर्नेछन् । सर्वोत्कृष्ट खेलाडीलाई विगतका संस्करणझैं यसपटक पनि ग्रेट हिमालय क्रिकेट एकेडेमीबाट ६ महिना निशुल्क प्रशिक्षणको व्यवस्था गरिएको छ । यस्तै उत्कृष्ट बलर र ब्याटरले ३ महिना निशुल्क प्रशिक्षण पाउनेछन् । यस्तै आयोजकले छनोट गरेका ३ उत्कृष्ट खेलाडीलाई एन्जल्स स्पोर्ट्स एकेडेमीले ३-३ महिना प्रशिक्षण सुविधा दिने भएको छ ।