काठमाडौं (हाम्रो खेलकुद) – मेलम्ची नगरालिका र पाँचपोखरी क्रिकेट क्लबले जिल्ला स्तरीय पाँचपोखरी टि२० क्रिकेट प्रतियोगिताको उपाधिका लागि प्रतिस्पर्धा गर्ने भएका छन् ।

पाँचपोखरी थाङपाल गाउँपालिका र सिन्धुपाल्चोक जिल्ला क्रिकेट संघको संयुक्त आयोजनामा जारी प्रतियोगिता अन्तर्गत आइतबार सम्पन्न सेमिफाइनल खेल वर्षाका कारण प्रभावित हुन पुग्यो । पहिलो सेमिफाइनल वर्षाका कारण रद्द भएपछि पाँचपोखरी क्रिकेट क्लब समूह विजेताको हैसियतले फाइनल प्रवेश गर्दा भोटेचौर स्पोर्ट्स क्लब भने बाहिरियो ।

दोस्रो सेमिफाइनल पनि मैदान भिजेका कारण ढिलो सुरु हुँदा १०-१० ओभरमा घटाइएको थियो । टियु क्रिकेट मैदानमा पहिलो ब्याटिङ गरेको द माइटि साँगाचोक क्लबले निर्धारित १० ओभरमा ८ विकेट गुमाएर ८१ रन बनाएको थियो । ओपनर प्रतिक श्रेष्ठले २१ र अशोक पौडेलले ३३ रन जोड्नुबाहेक अन्य ब्याटरले उल्लेख्य योगदान दिन सकेनन् । अशोकले १० बलमा १ चौका र ४ छक्का प्रहार गरेका थिए ।

जवाफमा मेलम्चीले पनि १० ओभरमा ५ विकेटको क्षतिमा ८१ रन नै बनाएपछि खेल सुपर ओभरमा धकेलियो । मेलम्चीका ओपनर रिजिंग लामाले सर्वाधिक ३३ रन जोडेका थिए । उनी प्लेयर अफ द म्याच घोषित भए ।

अन्तिम ओभरमा जितका लागि ९ रन आवश्यक हुँदा पहिलो बलमा चौका प्रहार गरेपनि त्यसपछि आवश्यक रन जोड्न सकेन । अन्तिम बलमा २ रन आवश्यक हुँदा १ रन मात्र लिएपछि खेल सुपर ओभरमा पुगेको थियो ।

मेलम्चीले सुपर ओभरमा १३ रन जोड्दा माइटि साँगाचोकले ११ रन मात्र जोड्न सक्यो । सेमिफाइनलमा प्लेयर अफ द म्याच चुनिएका अलराउन्डर सोनु देवकोटाले सुपर ओभरमा ब्याटिङ र बलिङ दुवैतर्फ राम्रो प्रदर्शन गरेर टोलीलाई जित दिलाए ।

फाइनल सोमबार टियु क्रिकेट मैदानमै हुनेछ ।

प्रतियोगिताको विजेताले १ लाख रुपैयाँ र उपविजेताले ५० हजार प्राप्त गर्नेछन् । सर्वोत्कृष्ट खेलाडीलाई विगतका संस्करणझैं यसपटक पनि ग्रेट हिमालय क्रिकेट एकेडेमीबाट ६ महिना निशुल्क प्रशिक्षणको व्यवस्था गरिएको छ । यस्तै उत्कृष्ट बलर र ब्याटरले ३ महिना निशुल्क प्रशिक्षण पाउनेछन् । यस्तै आयोजकले छनोट गरेका ३ उत्कृष्ट खेलाडीलाई एन्जल्स स्पोर्ट्स एकेडेमीले ३-३ महिना प्रशिक्षण सुविधा दिने भएको छ ।