काठमाडौं (हाम्रो खेलकुद) – तिरहुत टाइगर्सले लगातार दोश्रो पटक सप्तरी प्राइड लिग को उपाधि जितेको छ।

टाइगर्सले बिहिवार भएको फाइनलमा राजविराज राजदेवी रोयल्स लाई ९ विकेटले पराजित गर्दै उपाधि जितेको हो ।

सप्तरीको राजविराज स्थित पब्लिक विन्देश्वरी स्कुल मैदानमा ९३ रनको सामान्य लक्ष्य तिरहुतले १५.३ ओभरमा मात्र १ विकेट गुमाएर पूरा गर्यो।

टाइगर्सका ओपनर भोला शाहले अविजित अर्धशतक बनाए। भोलाले ४५ बलमा ५ चौका र ३ छक्का प्रहार गरे।

भोलाले दोश्रो विकेटको लागि निरज यादवसंग अविजित ७९ रनको साझेदारी गरे। निरजले अविजित १८ रन बनाउदा अभिनाश कर्णले १३ रन जोडे। रोयल्सका नितेश यादवले १ विकेट लिए।

त्यसअघि टस जितेर ब्याटिङ गरेको रोयल्सले २० ओभरमा ९ विकेट गुमाएर ९२ रन मात्र बनाउन सक्यो।

रोयलको लागि रोहन विकले सर्वाधिक २३ रन बनाए। यस्तै अभिषेक तिवारीले १९ र जितु यादवले अविजित १८ रन बनाउनु बाहेक अन्य ब्याटरले दोहोरो अंकमा रन बनाउन सकेनन्।

टाइगर्सका श्रवण यादवले सर्वाधिक ३, चित्र बहादुर बिस्ट र अनिल यादवले समान २ तथा राहुल मण्डल र अजय यादवको नाममा समान १ विकेट लिए ।

सप्तरी क्रिकेट संघद्वारा आयोजित प्रतियोगिताको उपाधि सहित विजेता तिरहुतले २ लाख र दोस्रो भएको रोयल्सले १ लाख रुपैयाँ प्राप्त गर्यो ।

रोयल्सका दिवान पुन प्रतियोगिताको सर्वोत्कृष्ट घोषित भए र उनले २५ हजार रुपैयाँ पाए। प्रतियोगिता भर उनले ४ खेलमा १ सय १ रन बनाउनुको साथै ६ विकेट पनि लिए।

४ खेलमा १ सय ३८ रन बनाएका टाइगर्सका भोला शाह उत्कृष्ट ब्याटर घोषित भए । ४ खेलमा १३ विकेट लिएका टाइगर्सका चित्र बहादुर बिष्ट उत्कृष्ट बलर चुनिए।

उत्कृष्ट ब्याटर र बलरले समान १५ हजार रुपैयाँ पाए। प्रतियोगिताको उदयमान खेलाडी टाइगर्सका अनिल यादव घोषित भए। ८ दिन संचालन भएको प्रतियोगितामा सप्तरी जिल्लाका ८ टोलीको सहभागी थियो।