एजेन्सी – न्युजिल्याण्डले जिम्बाब्वेमा जारी त्रिकोणात्मक टि ट्वान्टी आई सिरिजमा लगातार दोस्रो जित हात पारेको छ ।

जिम्बाब्वेको हरारेमा शुक्रवार न्युजिल्याण्डले घरेलु टोलीमाथि ८ विकेटको सहज जित हात पारेको हो । १ सय २१ रनको सहज लक्ष्य न्युजिल्याण्डले १३.५ ओभरमा २ विकेट गुमाएर पूरा गर्यो ।

न्युजिल्याण्डको जितमा ‘प्लेयर अफ द म्याच’ भएका डेभोन कन्वेले अर्धशतकीय इनिङ खेले । उनले ४० बलको सामना गर्दै ४ चौका र २ छक्काको सहयोगमा अविजित ५९ रन जोडे ।

रचिन रविन्द्र ३० रनमा आउट हुँदा ड्यारेल मिचेल २६ रनमा अविजित रहे । जिम्बाब्वेका लागि टिनोटन्डा मपोसा र ब्लेसिङ मुजरवानीले समान १ विकेट लिए ।

त्यसअघि हरारे स्पोर्टस क्लबमा टस हारेर ब्याटिङको निम्तो पाएको जिम्बाब्वेले निर्धारित २० ओभरमा ७ विकेट गुमाएर १ सय २० रन बनायो ।

जिम्बाब्वेका लागि ओपनर वेस्ली मधिभारी ३२ बलमा ४ चौकाको सहयोगमा सर्वाधिक ३६ रनमा आउट भए । अर्का ओपनर ब्रायन बेननेट २० बलमा १ चौका र १ छक्काको सहयोगमा २१ रनमा आउट भए । टाेनी मुन्योङ्गा १३ तथा कप्तान सिकन्दर राजा र रायन बर्ल समान १२ रनमा आउट भए ।

न्युजिल्याण्डका लागि म्याट हेनरीले ४ ओभरमा २६ रन खर्चिएर ३ विकेट लिए । एडम मिल्ने, कप्तान मिचेल स्यान्टेनर, मिचेल ब्रेसवेल र रचिन रविन्द्रले समान १ विकेट लिए ।

त्रिकोणात्मक सिरिजना दक्षिण अफ्रिका पनि छ । लगातार दुई जितका साथ न्युजिल्याण्ड ४ अंकका साथ शीर्ष स्थानमा छ । जिम्बाब्वे समान खेलमा अंक बिहिन छ । दक्षिण अफ्रिकाको समान खेलबाट २ अंक रहेको छ ।

त्रिकोणात्मक सिरिजमा आइतवार जिम्बाब्वे र दक्षिण अफ्रिकाको बीचमा खेल हुनेछ ।