काठमाडौं (हाम्रो खेलकुद)- टप एन्ड टी-ट्वान्टी सिरिजको दोस्रो खेलमा बङ्गलादेशको ‘ए’ ले नेपाललाई १ सय ८७ रनको चुनौती दिएको छ।

अष्ट्रेलियास्थित डार्विनको डिएक्ससी एरिनामा बङ्गलादेशले टस जितेर पहिले ब्याटिङ गर्ने निर्णय गर्यो।‌ निर्धारित २० ओभरमा ६ विकेट गुमाउँदै १ सय ८६ रन बनायो।

ओपनर जिसान अलाम र मोहम्मद नैम शेखले पहिलो विकेटको लागि ६२ रनको साझेदारी गरे। ६ ओभर २ बलमा सन्दीप‌ लामिछानेले पहिलो विकेट लिए।‌ नैम २५ रनमा आउट भए। जिसानले भने उत्कृष्ट प्रदर्शन गरे।

अर्धशतक प्रहार गरेका उनले ७३ रनको योगदान दिए। ४६ बल खेल्दै ४ चौका र ५ छक्का प्रहार गरे। उनलाई नन्दन कुमार यादवले एलबीडब्लु धरापमा पारे।

तेस्रो विकेटको रूपमा सैफ हसन ११ रन जोडेर रन आउट भए। यसपछि कप्तान नुरूल हसन मात्र ५ रनमा करण केसीको बलमा दीपेन्द्र सिंह ऐरीद्वारा कमयाड आउट भए। ४‌ विकेटको नोक्सानीमा बङ्गलादेशले १ सय ५१ रन बनाएको थियो।

लगत्तै रिजन ढकालले मोहीदुल ईस्लामलाई ७ रनमा र टोफेल अहमदलाई ५ रनमा आउट गरे। चौथो क्रमका आतिफ होसेनले उत्कृष्ट ब्याटिङ गरे। उनी अविजित ४८ रनमा रहे। उनले उनले २३ बल खेलेर ९ चौका प्रहार गरे।

बलिङमा रिजनले २ ओभरमा १९ रन दिएर २ विकेट लिए। यस्तै सन्दीप लामिछाने, करण केसी र नन्दन कुमार यादवले समान १/१ विकेट लिए।

नेपालको यो दोस्रो खेल हो। हिजो खेलेको पहिलो खेलमा नेपाल घरेलु टोली नर्दन टेरिटोरी स्ट्राइकसँग ४२ रनले पराजित भएको थियो। १ सय ७८ रनको लक्ष्य पछाएको नेपाल २० ओभरमा ८ विकेट गुमाउँदै मात्र १ सय ३५ रनमा समेटिएको थियो।

नेपालले पहिलो पटक यो प्रतियोगिता खेलेको हो। नेपालले लिग चरणमा कुल ६ खेल खेल्नेछ। यसपछि नेपालले मेलबर्न स्टार्स, होबार्ट हुरिकेन्स, मेलबर्न रेनेगेड्स र पाकिस्तानको ‘ए टिम सँग प्रतिस्पर्धा गर्नेछ।