काठमाडौं (हाम्रो खेलकुद)- अस्ट्रेलियामा जारी टप एन्ड टि ट्वान्टी सिरिजमा नेपाल लगातार दोस्रो खेलमा पराजित भएको छ ।

नेपाल आज आफ्नो खेलमा बंगलादेश ‘ए’ सँग ३२ रनले पराजित भएको छ। १ सय ८७ रनको लक्ष्य पछ्याएको नेपालले कुलश मल्लको अर्धशतकसहित २० ओभरमा ७ विकेट गुमाएर १ सय ५४ रन मात्र बनाउन सक्यो ।

कुशल मल्ल लगातार दोस्रो खेलमा टोलीका लागि सर्वाधिक रन बनाउने क्रममा ४७ बलमा ६ चौका र १ छक्कासहित नटआउट ५९ रनको योगदान गरे। उनलाई नन्दन यादवले नटआउट १४ रन बनाएर साथ दिए ।

नेपाल फेरि एक पटक ठूलो साझेदारी बनाउन चुकेको छ। आठौं विकेटका लागि अर्धशतक बनाएका कुशल मल्ल र नन्दनले ४७  रन को नटआउट साझेदारी गरे।

दोस्रो विकेटका लागि ओपनर आसिफ शेख र लोकेश बमले ३१ रनको साझेदारी गरे। कुशल र करण केसीले सातौं विकेटका लागि २१ रनको साझेदारी गरे। आसिफले २४ बलमा समान एक छक्का र चौकासहित २८ रन बनाए।

ओपनर कुशल भुर्तेल १२ रन, लोकेश १५, कप्तान रोहित पौडेल १० , करण ७ रन र दीपेन्द्र सिंह ऐरी १ मा आउट भए । गुलशन झा खाता नखोली आउट भए ‌।

बंगलादेश ‘ए’ का रकिबुल हसनले ३, हसन महमुदले २, रिपोन मण्डल र टोफेल अहमदले समान १ विकेट लिए।

अष्ट्रेलियास्थित डार्विनको डिएक्ससी एरिनामा  टस जितेर पहिले ब्याटिङ गरेको बंगलादेश ‘ए’ ले निर्धारित २० ओभरमा ६ विकेट गुमाउँदै १ सय ८६ रन बनायो।

ओपनर जिसान अलाम र मोहम्मद नैम शेखले पहिलो विकेटको लागि ६२ रनको साझेदारी गरे। ६.२ ओभरमा सन्दीप‌ लामिछानेले पहिलो विकेट लिए।‌ नैम २५ रनमा आउट भए। जिसानले भने उत्कृष्ट प्रदर्शन गरे।

अर्धशतक प्रहार गरेका जिसानले ७३ रनको योगदान दिए। ४६ बल खेल्दै ४ चौका र ५ छक्का प्रहार गरे। उनलाई नन्दनले एलबिडब्लु धरापमा पारे।

तेस्रो विकेटको रूपमा सैफ हसन ११ रन जोडेर रन आउट भए। यसपछि कप्तान नुरूल हसन मात्र ५ रनमा करणको बलमा दीपेन्द्रद्वारा आउट भए। ४‌ विकेटको नोक्सानीमा बंगलादेशले १ सय ५१ रन बनाएको थियो।

लगत्तै रिजन ढकालले मोहीदुल ईस्लामलाई ७ रनमा र टोफेल अहमदलाई ५ रनमा आउट गरे। चौथो क्रमका आतिफ होसेनले उत्कृष्ट ब्याटिङ गरे। उनी अविजित ४८ रनमा रहे। उनले उनले २३ बल खेलेर ९ चौका प्रहार गरे।

रिजनले २ ओभरमा १९ रन दिएर २ विकेट लिए। यस्तै सन्दीप लामिछाने, करण र नन्दन यादवले समान १ विकेट लिए।

नेपालको यो दोस्रो खेल हो। हिजो खेलेको पहिलो खेलमा नेपाल घरेलु टोली नर्दन टेरिटोरी स्ट्राइकसँग ४२ रनले पराजित भएको थियो। १ सय ७८ रनको लक्ष्य पछाएको नेपाल २० ओभरमा ८ विकेट गुमाउँदै मात्र १ सय ३५ रनमा समेटिएको थियो।

नेपालले पहिलो पटक यो प्रतियोगिता खेलेको हो। नेपालले लिग चरणमा कुल ६ खेल खेल्नेछ। यसपछि नेपालले मेलबर्न स्टार्स, होबार्ट हुरिकेन्स, मेलबर्न रेनेगेड्स र पाकिस्तानको ‘ए टिम सँग प्रतिस्पर्धा गर्नेछ।