काठमाडौं (हाम्रो खेलकुद)- नेपालले टप एन्ड टि-ट्वान्टी सिरिजमा लगातार दोस्रो जित निकालेको छ। सोमपाल कामीको सानदार बलिङमा नेपालले आज मेलबर्न रेनेगेड्सलाई ३३ रनले पराजित गर्यो।

जितको लागि १ सय ४० रनको सहज लक्ष्य पछाएको मेलबर्न रेनेगेड्स २० ओभरमा अल आउट हुँदै १ सय ६ रनमा समेटियो।

मेलबर्नले कमजोर सुरुवात गर्यो। टोलीले ३ विकेटको नोक्सानीमा २६ रन मात्र बनाएको थियो। ओपनर डायलन ब्रासर मात्र २ रनमा सोमपामले बलमा बोल्ड गरे ।

१६ रन बनाएका हयारी डिक्सन कुशल भुर्तेलको बलमा दीपेन्द्र सिंह ऐरीद्वारा क्याच आउट भए। यस्तै कप्तान विल्स सुदरल्याण्ड ६ रनमा सहाब अलामको बलमा आउट भए।

त्यसपछि पनि मेलबर्नको सम्हालिन सकेन। नेपाली बलरले विकेट लिए। ओलिभर पिके १४ रनमा रुपेश सिंहको शिकार बने। यसपछि सोमपालले जल लेमिरेलसई १८ रनमा र अर्जुन नेरलसई ३६ रनमा पबिलियनको बाटो देखाए।

लगत्तै ४ रन जोडेर लाचलान बाङ्स कुशल भुर्तेलको बलमा आउट भए। ८ विकेट गुमाउँदा ९५ रन बनाएको मेलबर्न हार नजिक पुगेको थियो।

त्यसपछि अन्तिम ओभरमा सोमपालले हयारी होक्स्ट्रालाई ११ र कालम‌ स्टोलाई शुन्य रनमा आउट गर्दै नेपाललाई सहज जित दिलाउँदै ५ विकेट लिन पनि सफल रहे।

सोमपालले सानदार बलिङ गर्दै ५ विकेटको सफलता प्राप्त गरे। उनले ४ ओभर बलिङ गर्दै मात्र १७ रन दिंदै सानदार प्रदर्शन गरे। कुशलले ३ तथा सहाब आलाम र रूपेश सिंहले १/१ विकेट लिए।

त्यसअघि टस जितेर पहिले ब्याटिङ गरेको नेपालले २० ओभरमा ९ विकेट गुमाउँदै १ सय ३९ रन बनायो।
ओपनर कुशल भुर्तेल १ रनमा र आरिफ शेख १२ रनमा आउट भए। २ नोक्सानीमा नेपालले ३० रन मात्र बनाएको थियो।

त्यसपछि भीम सार्की र कुशल मल्लले तेस्रो विकेटका लागि ५० रनको साझेदारी गरे। भीम २७ रनमा र कुशल २२ बल खेल्दै २९ रनमा पबिलियन फर्किए। कुशल नै नेपालको लागि सर्वाधिक रन जोड्ने खेलाडी बने।
गुलशन झा २ रनमा र सोमपाल रनको खाता नखोली आउट भए।

ब्याटिङमा संघर्ष गरेको नेपालले ६ विकेटको नोक्सानीमा मात्र ८३ रन बनायो। दीपेन्द्रले २७ र लोकेश बमले २४ रन बनाए। रुपेश सिंह अविजित १६ रनमा क्रिजमा रहे।
बलिङमा फर्गस ओ नेल, कालुम स्टो, लाचियन बाङ्स र माइकल आर्चरले समान २ विकेट झारे।

आजको खेलमा कप्तान रोहित पौडेल, सन्दीप‌ लामिछाने, आशिफ शेख, रिजन ढकाल र करण केसीललाई विश्राम दिइएको थियो।

५ खेलमा नेपालको यो लगातार दोस्रो जित हो। लगातार ३ खेलमा हार बेहोरेपछि नेपालले लगातार दुई जितेको हो।