एजेन्सी – शारजाहमा जारी टि ट्वान्टी त्रिकोणात्मक सिरिजमा पाकिस्तानले लगातार दोस्रो जित निकालेको छ। पाकिस्तानले शनिवार युएईलाई ३१ रनले हराएको छ ।

टस जितेर ब्याटिङ गरेको पाकिस्तानका लागि साइम अयुब र हसन नवाजले अर्धशतक प्रहार गरे। अयुबले ३८ बलमा ७ चौका र ४ छक्कासहित ६९ रन बनाए ।

नवाजले २६ बलमा ६ छक्का प्रहार गर्दै ५६ रन जोडे। पाकिस्तान २० ओभरमा २ सय ७ रन बनाएर अलआउट भयो।

यसअघि साहिबजादा फर्हान, फखर जमन र कप्तान सलमान आघा सस्तोमा आउट भएपछि अयुब र नवाजले पाकिस्तानलाई उकासेका थिए।

अयुबले आफ्नो चौथो टि ट्वान्टी आई अर्धशतक २५ बलमै पूरा गरे । नवाजले २४ बलमा ५० रन पूरा गर्दै स्पिनर हैदर अलीलाई लगातार ३ छक्का प्रहार गरेका थिए।

नवाजले मोहम्मद नवाजसँग पाँचौं विकेटका लागि २५ बलमा ५७ रनको साझेदारी गरे। मोहम्मद नवाजले १५ बलमा २५ रन बनाए।

अन्तिम पाँच ओभरमा पाकिस्तानले ६४ रन जोड्दा फहीम असरफले १६ रन बनाए। बलिङतर्फ युएईका जुनैद सिद्दिकी र सघिर खानले समान ३ विकेट लिए ।

२ सय ७ रनको लक्ष्य पछ्याउँदा युएईले २० ओभरमा ८ विकेट गुमाएर १ सय ७६ रन मात्र बनाउन सक्यो। असिफ खानले ३५ बलमा ७ छक्का र ५ चौकासहित ७७ रर बनाएर अन्तिम ओभरमा आउट भए।

कप्तान मोहम्मद वासिमले १८ बलमा ३३ रन जोडे तर छैटौं ओभरमा रनआउट भए। सिरिजको अर्को खेलमा सोमवार अफगानिस्तान र युएईबीच हुनेछ।