एजेन्सी – घरेलु टोली इंग्ल्यान्ड र दक्षिण अफ्रिकाले तीन खेलको टी-२० आई सिरिज उपाधि बाँडेका छन् । तेस्रो तथा अन्तिम टी-२० आई खेल आईतबार राती वर्षाको कारण हुन नसकेपछि खेल रद्द भएको थियो ।

इंग्ल्यान्डको नोटिंघममा नेपाली समय अनुसार राती ८ : ३० मा खेल सुरु हुनुपर्ने तालिका भएपनि लामो समयसम्म वर्षाको कारण खेल हुन नसकेपछि रद्द भएको थियो । पहिलो खेल दक्षिण अफ्रिकाले डकवर्थ लेविस पद्धतिको आधारमा १४ रनले जितेको थियो । दोस्रो खेलमा इंग्ल्यान्ड १ सय ४६ रनले विजयी हुँदै सिरिजमा १-१ को बराबरी गरेको थियो ।

दोस्रो खेलमा इंग्ल्यान्डले २ विकेट गुमाउँदै ३ सय ३ रन बनाएको थियो । ओपनर फिलिप साल्टले ६० बलमा १ सय ४१ रनको अविजित इनिंग खेलेका थिए । अर्का ओपनर जस बटलरले ३० बलमा ८३ रनको आक्रामक इनिंग खेलेका थिए ।

त्यसअघि भएको तीन खेलको ओडीआई सिरिज भने दक्षिण अफ्रिकाले २-१ ले जितेको थियो । अव दक्षिण अफ्रिकाले एक मात्रै टी-२० आई खेल नामिबियासँग ११ अक्टोबरमा खेल्नेछ । त्यसपछि दक्षिण अफ्रिका दुई टेस्ट, समान तीन टी-२० आई र ओडीआई सिरिज खेल्न पाकिस्तान जानेछ ।

इंग्ल्यान्डले भने १७, १९ र २१ सेप्टेम्बरमा आयरल्यान्डसँग टी-२० आई सिरिज खेल्नेछ । इंग्ल्यान्डको दोस्रो रोजाईको टोली खेल्नेछ । त्यसपछि समान तीन ओडीआई र टी-२० आई सिरिज खेल्न न्युजिल्यान्ड जाने तालिका छ ।