एजेन्सी – भारतले एसीसी टी-२० एसिया कपमा पाकिस्तानलाई ७ विकेटले हराउँदै लगातार दोस्रो जितका साथ सुपर ४ नजिक पुगेकोछ । जित्नलाई १ सय २८ रनको लक्ष्य पछ्याएको भारतले १५.५ ओभरमा ३ विकेट गुमाउँदै पूरा गर्यो ।

भारतका कप्तान सूर्यकुमार यादव ३७ बलमा ५ चौका र १ छक्कासहित ४७ तथा शिबम दुबे १० रनमा अविजित रहे । भारतका ओपनर अभिषेक शर्मा १३ बलमा ४ चौका र २ छक्कासहित ३१, शुभमन गिल १० र तिलक बर्मा ३१ रनमा आउट भए ।

तिलकलले ३१ बलमा २ चौका र १ छक्का हाने । पार्टटाइम स्पिनर सैम अयुबले गिललाई स्टम्पिङ, अभिषेक शर्मालाई क्याच आउट र तिलक बर्मालाई बोल्ड आउट गरेका थिए । पाकिस्तानका सैम अयुबले ४ ओभरमा ३५ रन खर्चेर ३ विकेट लिए ।

त्यसअघि दुबई क्रिकेट रंगशालामा टस जितेर पहिला ब्याटिङ रोजेको पाकिस्तानले निर्धारित २० ओभरमा ९ विकेट गुमाउँदै १ सय २७ रन बनाएको थियो । पाकिस्तानका ओपनर सहिबजादा फहरानले ४४ बलमा १ चौका र ३ छक्कासहित सर्वाधिक ४० रन बनाए । शाहिन शाह अफ्रिदीले तल्लोक्रममा १६ बलमा ४ छक्कासहित अविजित ३३ रन बनाउँदै पाकिस्तानको साख जोगाए । फखर जमानले १५ बलमा ३ चौकासहित १७ रन बनाउँदा अन्यको प्रदर्शन सम्झन लायक थिएन ।

ओपनर सैम अयुब डक, मोहम्मद नवाज डक, फहिम अशरफ ११, सुफ्यान मकीम १०, मोहम्मद हरिस र सलमान अली अघा ३(३ रनमा आउट भए । भारतको जितमा स्पिनर कुलदीप यादवले ४ ओभरमा १८ रन खर्चेर ३ विकेट लिए । स्पिनर अक्षर पटेल र जस्प्रित बुमराहले २(२ विकेट लिए । हार्दिक पाण्ड्या र बरुण चक्रवर्तीले १-१ विकेट लिए ।

भारत समूह ए मा ४ अंकका साथ शीर्ष स्थानमा छ । पहिलो खेलमा युएईलाई ९ विकेटले हराएको भारतले आफ्नो समूह चरणको अन्तिम खेल शुक्रबार ओमानसँग खेल्नेछ । पाकिस्तान २ खेलमा १ मा जित र १ मा हारसहित दोस्रो स्थानमा छ । पहिलो खेलमा ओमानलाई ९३ रनले हराएको पाकिस्तानले अन्तिम खेल बुधबार युएईसँग खेल्नेछ । पाकिस्तानलाई सुपर फोरमा पुग्न उक्त खेल पाकिस्तानले जित्नै पर्ने हुन्छ ।

समूह बी मा सुरुवाती जितका साथ नेटरनरेटका कारण अफगानिस्तान शीर्ष र श्रीलंका दोस्रो स्थानमा छन् । २ खेलमा १ मा जित र १ मा हारसहित बंगलादेश तेस्रो र जितविहीन हङकङ पुछारमा छन् । हरेक समूहका शीर्ष दुई टोलीले सुपर फोर खेल्नेछन् ।

गतवर्ष एसीसी प्रिमियर कपमा चौथो स्थानमा रहेपछि नेपालले भने यस एसिया कप खेल्न पाएन । प्रिमियर कपको विजेता युएई, उपविजेता ओमान र तेसा्रे बनेको हङकङ एसिया कप खेल्न पाएका हुन् ।