एजेन्सी- एसीसी टि ट्वान्टी एसिया कपमा भारत र पाकिस्तानका खेलाडीले एकअर्कासँग हात नमिलाई ड्रेसिङ रुममा फर्किएका छन् ।

दुबई क्रिकेट रंगशालामा आइतवार समूह ‘ए’ को खेलमा भारतले पाकिस्तानलाई ७ विकेटले हराउँदै लगातार दोस्रो जित हात पार्यो ।

जित्नलाई १ सय २८ रनको लक्ष्य पछ्याएको भारतले १५.५ ओभरमा ३ विकेट गुमाउँदै पूरा गर्यो । स्पिनर सुफ्यान मकिमलाई सूर्य कुमार यादवले छक्का हान्दै खेल सकाए । खेल सकाए लगत्तै सूर्य कुमार र शिवम दुबे सिधै ड्रेसिङ रुमतर्फ लागेका थिए ।

क्रिकेटको परम्परा अनुसार खेल सकाएपछि ब्याटरले विपक्षी खेलाडी र अम्पायरसँग हात मिलाएपछि मात्रै ड्रेसिङ रुममा जाने गर्दछन् ।

ड्रेसिङरुम तथा डकआउटमा भएका खेलाडी तथा अफिसल मैदानमा आएर एकअर्कासँग हात मिलाउने गर्दछन् । तर भारतीय खेलाडी र अफिसल मैदान आएनन् । पाकिस्तानी खेलाडी जम्मा भएपनि भारतीय खेलाडी नआएपछि उनीहरु पनि आफ्नो ड्रेसिङ रुमतर्फ लागेका थिए ।

टसको समयमा भारतका कप्तान सूर्य र पाकिस्तानका सलमान अली अघाले एकअर्कालाई नहेरी फर्किनुको साथै हात पनि मिलाएका थिएनन् । केही महिना अघि भारतको जम्मु कश्मिरको पहलगाममा पाकिस्तानी आतंककारी आक्रामणपछि दुई देशबीचको सम्बन्ध थप बिग्रिएको छ ।

उक्त आक्रामण अघि भने यी दुई देशका खेलाडीले एक अर्कामा हात मिलाउथे । उक्त आक्रामण अघि देशको राजनीतिक सम्बन्ध खराब रहेपनि खेलाडीबीच मैदानमा राम्रो सम्बन्ध देखिदै आएको थियो । पछिल्लो एक दशकदेखि यी दुई टोलीले आईसीसी र एसीसीको प्रतियोगिता मात्रै खेल्दै आएका छन् ।

पहलगाम आक्रामणपछि दुई देशका सैन्यबीच युद्ध भएको थियो । त्यसपछि भारतले पाकिस्तानसँग कुनैपनि खेल खेल्न नहुने आवाज उठ्दै आएको थियो । तर भारतले भने सिरिज बाहेक अन्य खेल्ने घोषणा गरी सकेको छ ।