एजेन्सी – पाकिस्तानका सर्वाधिक सफल टि ट्वान्टी ब्याटर बाबर आजमको स्थान लिँदै टोलीमा परेका ओपनर सैम अयुब एसिसी टि ट्वान्टी एसिया कपमा लगातार तेस्रो खेलमा डक आउट (शून्य) भएका छन् ।

दुबई क्रिकेट रंगशालामा टस हारेर पहिला ब्याटिङको निम्तो पाएको पाकिस्तानले ओपनर सैम अयुबलाई पाँचौं बलमै गुमायो ।

उनी तीव्र गतिका बलर जुनैद सिद्दिकको बलमा डिप थर्डमा मोहम्मद रहिदबाट क्याच आउट भएका हुन् । यसअघि उनी भारतविरुद्ध हार्दिक पान्ड्याको बलमा पहिलो बलमै जस्प्रित बुमराहबाट क्याच आउट भएका थिए ।

पहिलो खेलमा ओमानविरुद्ध उनी दोस्रो बलमै फैसल शाहको बलमा एलबिडब्लू आउट भए । अर्का ओपनर सहिबजादा फरान युएईविरुद्ध १२ बलमा ५ रन बनाउँदै क्याच आउट भएका छन् । उनी यसअघि ४४ बलमा ४० र ओमानविरुद्ध २९ बलमा २९ रनमै आउट भएका थिए ।

पाकिस्तानले आफ्ना दुई सर्वाधिक सफल टि ट्वान्टी ब्याटर तथा ओपनर बाबर आजम र मोहम्मद रिजवानलाई स्ट्राइकरेट कम भएको (टि ट्वान्टी शैलीमा) नखेलेको भन्दै टिमबाट हटाएको थियो ।

तर उनीहरुको स्थानमा आएका दुबै ओपनरको प्रदर्शन झनै कमजोर बनेको छ । बाबर र रिजवानलाई राजनीतिक कारण टोलीमा नराखेको भन्दै पाकिस्तानको चौतर्फी चर्को आलोचना भएको छ ।

आइतवार भारतसँग १ सय २७ रन बनाउँदै ७ विकेटले हारेपछि पाकिस्तानको आलोचना झनै बढेको छ । सुपर फोरमा पुग्न निर्णायक खेलमा पाकिस्तानले ३.४ ओभरमा १७/२ को अवस्थामा छ ।