एजेन्सी – श्रीलंकन युवा अलराउण्डर दुनिथ वेलालागेका बुवा सुरुगांको ५४ वर्षको उमेरमा हृदयघातको कारण मृत्यु भएको छ ।

एसिसी टि ट्वान्टी एसिया कपमा श्रीलंका र अफगानिस्तानबीचको खेल हेर्दै गर्दा उनलाई हृदयघात भएको अन्तर्राष्ट्रिय मिडियाले जनाएका छन् ।

आबुधाबीमा बिहीवार भएको खेलमा पहिलो इनिङको अन्तिम ओभरमा दुनिथलाई अफगानिस्तानका मोहम्मद नाबीले लगातार ५ छक्का हानेका थिए ।

हृदयघातको कारण आधिकारिक रुपमा खुलेको छैन । तर केही अन्तर्राष्ट्रिय मिडियाले खेल हेर्दै गर्दा हृदयघात भएको जनाएका छन् ।

श्रीलंका मिडिया लंकासाराका अनुसार सुरुंगाले अफगानिस्तान र श्रीलंकाबिचको खेल टेलिभिजनमा हेरेका थिए । छोराले लगातार ५ छक्का खाएपछि अत्याधिक भावनात्मक तनावको कारण सुरंगालाई छातीमा गम्भीर दुखाई भएको थियो ।

दुखाई लगत्तै उनलाई अस्पताल लगिएपनि बचाउन नसकेको लंकासाराले जनाएको छ । दुनिथलाई खेल सकिएपछि श्रीलंकाका कप्तान, प्रशिक्षक र टोली म्यानेजरले बावुको घटना सुनाएका थिए ।

सुपर फोरमा पुग्न जित्नै पर्ने खेलमा स्पिनर महेश थिक्सेनाको स्थानमा श्रीलंकाले अफगानिस्तानविरुद्ध उनलाई मौका दिएको थियो । चौथो ओभरमै आएका दुनिथ पहिलो ओभरमा ५ रन दिएका थिए ।

पहिलो बलमै चौका खाएपनि त्यसपछि ५ मध्ये ४ बल डट राखेका थिए । छैटौं ओभरमा उनले ५ रन दिए । त्यसपछि उनले १३ औं ओभरमा अफगानिस्तानका सर्वाधिक भरपर्दा ब्याटर इब्राहिम जद्रानलाई २४ रनमा क्याच आउट गराएका थिए । उनको सुरुवाती ३ ओभरमा २ चौकासहित कुल १७ रन खर्चेर १ विकेट लिएका थिए ।

श्रीलंका कप्तान चरिथ असंलकाले अन्तिम ओभर उनलाई दिन बाहेक अर्को विकल्प थिएन । किनभने अन्य चार बलरको समण ४ ओभर कोटा सकिसकेको थियो ।

प्रमुख तीव्र गतिका बलर नुवान थुषरा, दुश्मिन्था चामिरा, मध्यगतिका बलर दासुन शानका र स्पिनर वानिन्दु हसरंगा स्पेल सकिएको हुँदा उनीसँग दुनिथ अन्तिम विकल्प थिए । तर ४० वर्षीय अनुभवी नाबी उनीमाथि हाबी बने ।

अफगानिस्तान १९ ओभरमा १३७-७ को अवस्थामा हुँदा र सुपर फोरमा पुग्न जित्नै पर्ने हुँदा नाबी आक्रामक बनेका थिए । नाबीले उनलाई पहिलो बल लङअफ, दोस्रो र तेस्रो बल लङअनमा लगातार ३ छक्का हानेपछि उनी समस्यामा परेका थिए ।

युवा अलराउण्डर उनले दबाबमा त्यसपछि नो बल र लगातार २ छक्का भेटेका थिए । अन्तिम ओभरमा नाबीले ३२ रन जोडेपछि अफगानिस्तानले २० ओभरमा ८ विकेट गुमाउँदै १ सय ६९ रन बनाएको थियो । दुनिथले ५ रनमा नाबीको क्याच समेत छाड्न पुगेका थिए ।

१७ औं ओभरको दोस्रो बलमा दुश्मन्था चामिराको बलमा दुनिथले ब्याकवार्ड डीपस्क्यार लेगमा क्याच छाड्न पुगेका थिए ।

तर नाबीले २२ बलमा ३ चौका र ६ छक्कासहित कुल ६० रन जोड्दै अफगानिस्तानको आशा जगाएका थिए । श्रीलंकाले १ सय ७० रनको लक्ष्य १८.४ ओभरमा ४ विकेट गुमाउँदै पूरा गर्यो ।

खेलपछि श्रीलंकाका खेलकुद पत्रकारले नाबीलाई उनको बुवको मृत्युको घटना सुनाएका थिए । त्यो सुनेपछि नाबी माफी माग्दै निराशका साथ टोलीको बस चढेका थिए । उनका बुव सुरंगा घरेलु क्रिकेट खेलेका खेलाडी हुन् । बुवाको प्रशिक्षणमै दुनिथले बाल्यकालमा क्रिकेट सिकेका थिए ।

२२ वर्षीय दुनिथ श्रीलंका क्रिकेटमा सम्भावना बोकेका युवास्टार हुन् । उनले १ टेस्ट, ३१ ओडिआई र ५ टि ट्वान्टी आई खेल खेलेका छन् ।

सन् २०२३ को एकदिवसीय एसिया कपमा उनले भारतविरुद्ध ५ विकेट लिनुको साथै ४२ रन जोड्दै हारका बाबजुद प्लेयर अफ द म्याच चुनिएका थिए ।

२०२४ मा तेस्रो ओडिआई खेलमा कोलम्बोमा भारतलाई १ सय ३८ रनमा अल आउट गर्दै १ सय १० रनको फराकिलो जित दिलाउन उनले एक्लै ५ विकेट लिएका थिए ।