काठमाडौं (हाम्रो खेलकुद)- नेपाल क्रिकेट संघ ( क्यान) ले आज मलेसियाविरुद्धको टि ट्वान्टी सिरिजका लागि राष्ट्रिय महिला क्रिकेट टोलीको घोषणा गरेको छ।

अनुभवी खेलाडी सीता राना मगरले टोलीमा पुनरागमन गरेकी छिन्।‌ यसअघिको टोलीमा ५ खेलाडी परिवर्तन गरिएको छ।

सीता चोटका कारण लामो समय मैदान बाहिर थिइन्। यशोदा बिष्ट पहिलो पटक राष्ट्रिय टोलीमा स्थान बनाउन सफल रहिन्।

पछिल्लो पटक ग्लोबल क्वालिफायर खेल्दाका ५ खेलाडीले‌ यसपटक पटक टोलीमा छैनन्। विन्दु रावल, मनिषा उपाध्याय, सबनम राई, ईश्वरी बिष्ट र रोमा थापा‌ टोलीमा परेनन्।‌

उनीहरूको ठाउँमा सीता र यशोदासँगै सोमु बिष्ट, रचना चौधरी र साबित्रा धामी परेका छन्। नेपाल र मलेसिया महिला राष्ट्रिय क्रिकेट टोलीबीच असोज १६ देखि २२ गते (अक्टोबर २ देखि ८)  सम्म टि ट्वान्टी सिरिज हुनेछ।

त्यसअघि असोज ८ देखि १४ गते (सेप्टेम्बर २४ देखि ३०)  सम्म हुने मलेसियन सुपर वुमन्स सिरिजमा नेपाली टोलीका खेलाडीले ५ फरक टोलीबाट खेल्नेछन्।
ग्लोबल क्वालिफायरको तयारीको लागि यो सिरिजमा नेपालले सहभागिता जनाउन लागेको हो।

नेपाली राष्ट्रिय महिला क्रिकेट टोली

इन्दु बर्मा, पूजा महतो, राममति ऐरी, सम्झना खड्का, कविता जोशी, रिया शर्मा, सोमु बिष्ट, रचना चौधरी, रुबी पोद्दार, यशोदा बिष्ट, सावित्रा धामी,कविता कुँवर, रुविना क्षेत्री, सिता राना मगर