एजेन्सी – ओपनर शहिबजादा फरानको अर्धशतकको सहयोगमा पाकिस्तानले एसीसी टी ट्वान्टी एसिया कपमा भारतलाई १ सय ७२ रनको प्रतिस्पर्धात्मक लक्ष्य दिएको छ । दुबई अन्तर्राष्ट्रिय क्रिकेट रंगशालामा टस हारेर पहिला ब्याटिङको निम्तो पाएको पाकिस्तानले २० ओभरमा ५ विकेट गुमाउँदै १ सय ७१ रन बनायो ।

पाकिस्तानका ओपनर शहिबजादा फरानले ४५ बलमा ५ चौका र ३ छक्कासहित सर्वाधिक ५८ रन बनाए । इनिङको तेस्रो बलमै हार्दिक पान्ड्याको बलमा ठूलो सट खेलेका फरानको क्याच अभिषेक शर्माले खाता नखोल्दै डीप थर्डमा र ३२ रनमा डिपमिडविकेटमा क्याच छाडेका थिए । दुई क्याचको फाइदा उठाउँदै फरानले महत्वपूर्ण अर्धशतक प्रहार गरे ।

पाकिस्तानलाई ओपनर फखर जमान र शहिबजादा फरानले २.३ ओभरमा २१ रन जोड्दै आक्रामक सुरुवात दिलाएका थिए । लगातार तीन खेलमा शून्यमा आउट भएपछि सैम अयुबको स्थानमा पाकिस्तानले फखरलाई ओपनिङमा ल्याएको थियो ।
तर फखरलाई थर्डअम्पायरले विवादस्पद आउट भए । हार्दिक पान्ड्याको बलमा एज लागेर विकेटकिपर सञ्जु स्यामसनले उनको क्याच लिएका थिए । तर बल पहिला जमिनमा लागेर किपरको गल्भ्समा गएको देखिएपनि अम्पायरले आउट दिएका थिए ।

दोस्रो विकेटलाई सैम अयुब र फरानले ७२ रनको महत्वपूर्ण साझेदारी गर्दै पाकिस्तानलाई बलियो योगफलको सम्भावना देखाएका थिए । सैम दुबेको बलमा १७ बलमा १ चौका र १ छक्कासहित २१ र हुसेन तालत १० रनमा आउट भए । सुरुवाती १० ओभरमा १ विकेट गुमाउँदै ९१ रन बनाएको पाकिस्तानले त्यसपछि भने रनको गति बढाउन सकेन ।

मोहम्मद नवाज १९ बलमा २१ रनमा आउट भए । फहिम अशरफले ८ बलमा १ चौका र २ छक्कासहित २० तथा कप्तान सलमान अली अघा १७ रनमा अविजित रहे ।

भारतका शिबम दुबेले ४ ओभरमा ३३ रन खर्चेर २ विकेट लिए । जस्प्रित बुमराहले ४ ओभरमा ४५ रन खर्चिदा विकेटविहीन बने । कुलदीप यादव र हार्दिक पान्ड्याले १–१ विकेट लिए । यसअघि समूह चरणमा पाकिस्तान भारतसँग ७ विकेटले हार्न पुगेको थियो ।