काठमाडौं (हाम्रो खेलकुद) – नेपाल प्रिमियर लिगको फ्रेन्चाइज टोली लुम्बिनी लायन्सले तिलोत्तमा क्रिकेट लिगको सर्वोत्कृष्ट खेलाडीलाई आफ्नो एनपिएल क्याम्पमा समावेश गर्ने भएको छ ।

तिलोत्तमा क्रिकेट विकास समितिको आयोजनामा असोज १९ गतेदेखि एक्स्ट्राटेक ओभल मैदानमा माध्यमिक विद्यालय स्तरीय क्रिकेट लिग हुँदैछ । खेलमा १९ वर्षमुनि उमेरका कक्षा १२ सम्म अध्ययनरत खेलाडी सहभागी हुन पाउनेछन् । सहभागी टीममा खेलासिकी एकेडेमी, नेपथ्य कलेज, बुटवल डाईनामाईट, विश्व लायन टटल्स, पी टु के डी र द रिभीभेलियन्स रहेका छन् ।

अक्सनका लागि २ सय खेलाडीको नाम दर्ता भएकामा अक्सनमार्फत प्रत्येक टोलीले समान १४ गरी ८४ खेलाडीलाई अनुबन्ध गरेको उपाध्यक्ष कृष्ण प्रसाद भुषालले बताए । प्रत्यक टोलीका कप्तान र मार्की खेलाडीले १० हजार रुपैयाँ र बाँकी खेलाडीले ५ हजार रुपैयाँ पाएका छन् । प्रतियोगिताको सर्वोत्कृष्ट खेलाडीले लुम्बिनी लायन्सको तयारी क्याम्पमा सहभागी हुने अवसर पाउनेछन् ।

द रिभाइभलियन्सको कप्तानी सिद्धार्थ ढकालले गर्नेछन् भने मार्की खेलाडी प्रिन्स पाल रहने छन् । खेलसिकी ओर्कासको कप्तानी अञ्जिला पाठकले गर्नेछिन् । उनी ६ टोलीमध्ये एक मात्र महिला कप्तान हुन् । उनको टोलीमा मार्की खेलाडी सुशान्त सुवेदी रहेका छन् ।

विश्व लायन टर्टल्सको कप्तानी आशुतोष पाण्डेले गर्नेछन् । उनको टोलीको मार्की खेलाडी शुभम खनाल रहने छन् । छैटौं टोली पिके २ डीको कप्तानी सागर भण्डारीले गर्नेछन् भने मार्की खेलाडीमा रुद्रांश भट्टराई छन् ।

बुटवल डायनामाइटको कप्तानी सागर गैरेले गर्दा मार्की खेलाडी सुप्रीम कँडेल रहेका छन् । नेपथ्य ईगलको कप्तानी लक्ष्मण कुम्हालले गर्नेछन् भने मार्की खेलाडी समीर अली रहेका छन् ।