काठमाडौं (हाम्रो खेलकुद)- कर्णाली याक्स स्पोर्टस प्रा.लिले नेपाल प्रिमियर लिग (एनपिएल) का लागि होटेल याक एण्ड यतिसँग सहकार्य गरेको छ ।

कर्णाली याक्सका निर्देशक गृहेन्द्र घिमिरे र होटल प्रतिनिधिबीच आज सम्झौतामा हस्ताक्षर भयो । यसअघि एनपिएलको दोस्रो संस्करणको लागि पनि कर्णाली याक्सले हिल्टन होटेलसँग सम्झौता नवीकरण गरेको थियो ।

जेनजी प्रदर्शनको क्रममा हिल्टनमा आगलागी भएपछि कर्णाली याक्सले याक एण्ड यतिसँग हस्पिटालिटी पार्टनरको रुपमा सम्झौता गरेको हो ।

एनपिएलका दौरान कर्णाली याक्सका खेलाडी तथा अफिसियल दरबारमार्ग स्थित याक एण्ड यति होलटमा बस्नेछन् ।

एनपिएल ( २०८१ मंसिर १५ गतेदेखि पुस ६ गतेसम्म) को पहिलो संस्करणमा कर्णाली याक्सले दोस्रो क्वालिफायरसम्मको यात्रा तय गरेको थियो ।

मंसिर १ देखि २७ गतेसम्म हुने दोस्रो संस्करणमा पनि कर्णालीले उत्साहजन सहभागिताको लागि प्रशिक्षकमा ज्ञानेन्द्र मल्ललाई नियुक्त गरेको छ ।

यस्तै, कर्णाली याक्सले प्रतियोगिताको दोस्रो संस्करणका निम्ति मार्कीसहित सात खेलाडीलाई रिटेन गरिसकेको छ ।

कर्णाली याक्सले मार्की सोमपाल कामीसँगै गुलशन झा, नन्दन यादव, विपिनप्रसाद शर्मा, दीपेन्द्र रावत, अर्जुन घर्ती र युनिससिंह ठकुरीले रिटेन गरेको थियो ।