दुबई (हाम्रो खेलकुद) – नेपालले पहिलो टी–२० आई खेलमा वेष्टइण्डिजलाई १ सय ४९ रनको लक्ष्य दिएको छ । शारजाह क्रिकेट रंगशालामा टस हारेर पहिला ब्याटिङको निम्तो पाएको नेपालले निर्धारित २० ओभरमा ८ विकेट गुमाउँदै १ सय ४८ रन बनायो ।

नेपालका कप्तान रोहित पौडेलले सर्वाधिक ३८, कुशल मल्लले ३० र गुल्शन झाले २२ रन बनाए । नेपालको सुरुवात भने राम्रो हुन सकेन ।

ओपनर कुशल भुर्तेल तेस्रो ओभरको पहिलो बलमा स्पिनर तथा कप्तान अकिल हुसेनलाई अघि बढेर सट खेल्ने खोज्दा इनस्वींग (लेगस्टम्पमा) आएको बल मिस भएपछि विकेटकिपर आमिर जांगोबाट ६ रनमा स्टम्पिङ आउट भए । अर्का ओपनर आसिफ शेख अर्को ओभरको पहिलो बलमा अनुभवी जेसन होल्डरलाई सट खेलेपनि ब्याटमा राम्रोसँग नलागेपछि मिडअनमा केसी कार्टीबाट ३ रनमा क्याच आउट भए ।

एक समय ३.१ ओभरमा १२-२ को अवस्थामा पुगेको नेपाललाई तेस्रो विकेटलाई कुशल मल्ल र रोहित पौडेलले ५८ रनको साझेदारी गर्दै राम्रो योगफलको आधार देखाएका थिए । कुशल मल्ल स्पिनर नविन बिडैसीलाई ठूलो सट खेल्ने धुनमा लङअनमा जेसन होल्डबाट क्याच आउट भए । उनले २१ बलमा २ चौका र २ छक्कासहित ३० रन जोडे ।

नविनलाई नै १३ औं ओभरको चौथो बलमा ठूलो सट खेलेका रोहित डीपमिडविकेटमा क्याच आउट हुन पुगेका थिए । ३५ बलमा ३ चौका र १ छक्कासहित सर्वाधिक ३८ रन बटुले ।

गुलशन झाले नेपाललाई राम्रो अन्त्यको सम्भावना देखाएका थिए । तर नविनलाई नै १७ औं ओभरको पाँचौं बलमा ठूलो सट खेल्दा केसी कार्टीबाट तेस्रो प्रयासमा लङअफमा क्याच आउट भए । गुल्शनले १६ बलमा २ छक्कासहित २२ रन जोडे । टेस्ट टोलीविरुद्ध संघर्ष गर्दै आएका दीपेन्द्रसिंह ऐरी १९ बलमा १ छक्कासहित १७ रनमा क्याच आउट भए । सन्दीप जोरा ९ र करण केसी डक आउट भए । १९ औं ओभरमा दीपेन्द्र, करण र सन्दीप क्याच आउट भएका थिए ।

वेष्टइण्डिजका मध्य गतिका बलर जेसन होल्डरले ४ ओभरमा २० रन खर्चेर ४ विकेट लिए । स्पिनर नविन बिडैसीले ४ ओभरमा २९ रन खर्चेर ३ विकेट लिए । कप्तान अकिल हुसेनले ४ ओभरमा १८ रन खर्चेर १ विकेट लिए ।

नेपालले सुरुवाती ६ ओभरमा २ विकेट गुमाउँदै ३४ रन, त्यसपछि ७ देखि १५ ओभरमा २ विकेट गुमाउँदै ७४ र १६ देखि २० ओभरमा ४ विकेट गुमाउँदै ४० रन बटुलेको थियो ।

नेपालले आजको खेलमा स्पिनर सन्दीप लामिछानेलाई अन्तिम १५ मै राखेको छैन । तीन खेलको सिरिजमा दोस्रो खेल सोमबार र तेस्रो मंगलबार शारजाहमा हुँदैछ । नेपालको घरेलु मैदान टीयु निर्माणधिन हुँदा अर्को सातादेखि ओमानमा हुने टी२० विश्वकप छनोट अघि तयारीको रुपमा नेपालले वेष्टइण्डिजसँग तीन खेलको सिरिज खेलेको हो ।