काठमाडौं (हाम्रो खेलकुद) – विश्व क्रिकेट लिग च्याम्पियनसिप अन्तर्गत नेपाल र केन्याको खेल शनिबार वर्षाका कारण विथोलिने सम्भावना बढ्दै गएको छ ।
शुक्रबार दिउँसोदेखिको वर्षातका कारण पिच र आउट फिल्ड भिजेको र मौसमविद्का अनुसार शनिबार पनि पानी पर्न सक्ने सम्भावना रहेकाले खेल सुरु हुन केहि समय लाग्न सक्ने अनुमान गरिएको छ।
खेल तालिका अनुसार बिहान ९ बजे टस गरेर साढे ९ बजेदेखि खेल सुरु हुने भनिएपनि अम्पायरले कण्डिसन ठिक नभए केहि पर सार्न सक्नेछन्।
यदि शनिबार खेल हुन नसकेको खण्डमा आइतबार खेल सञ्चालन गरिनेछ। पहिलो इनिङ् आज सकिएको स्थितिमा भोली त्यहिंबाट खेल सुरु हुनेछ। तर,दोश्रो इनिङको २० ओभर आज भ्याइएमा भने खेलको नतिजा डकवर्थ लेविस पद्दतिबाट लिइनेछ।
शनिबारको खेलका लागि अम्पायरमा सिंगापुरका सारिका र नेपालको विनयकुमार झा छन् भने रिजर्भ अम्पायरमा नेपालकै देवेन्द्र सुवेदी छन् ।
