काठमाडौं (हाम्रो खेलकुद)– नेदरल्यान्ड्सलाई उसकै मैदानमा एउटा खेलमा हराएर फर्केको नेपालले घरेलु मैदानमा शनिबार केन्यालाई हराउने अपेक्षा गरिएको थियो । तर, बर्षाले प्रभावित खेलमा अनुभवी केन्याले नेपालसँगको खेल ५ विकेटले आफ्नो पक्षमा पार्यो । सोमबार फेरी नेपाल र केन्याबीच दोस्रो खेल हुँदैछ । केन्यासँगको दोस्रो खेल पनि गुमाए नेपाललाई च्याम्पियनसिपको शीर्ष ४ भित्र पर्न कठिन हुन सक्छ ।

पेटको शल्यक्रियापछि एक साताअघि मात्र अभ्यासमा फर्केका नियमित कप्तान पारस खड्का पहिलो खेलमा थिएनन् । नेपालको ब्याटिङ कमजोर हुनुमा पारस नहुनुलाई मान्ने पनि धेरै छन् । बर्षाले ३८ ओभरमा घटाइएको थियो । तर टस हारेर पहिले ब्याटिङ गरेको नेपालले ३६ ओभरमा ८ विकेटको क्षेतिमा १ सय १२ रन बनाएको थियो ।

बर्षाले नेपालले अन्तिम दुई ओभर खेल्न पाएन । डकवर्थ लेविस पद्धतिमा केन्याले २९ ओभरमा १ सय ४ रनको लक्ष्य पाएको थियो । केन्याले २१.२ ओभरमा ५ विकेट गुमाई ८० रन बनाएको अवस्थामा वर्षाले पुनः खेल रोकिएको थियो । पछि पुनः खेल सुरु हुदा केन्याले २६ ओभरभित्र ९४ रन बनाउनुपर्ने भयो, जुन केन्याले ११ बलअगाडि नै पूरा गरेको थियो ।

पहिलो खेलमा नेपाललाई हराएको केन्या पाँच खेल बाँकी रहदा १० अंकसहित पाँचौ स्थानमा छ । ८ राष्ट्र सहभागिता रहेको च्याम्पियनसिपमा नेपाल ६ अंकसहित छैटौं स्थानमा छ । नेदरल्यान्ड्स १६, पपुवा न्यु गिनी १२, तथा हङकङ र स्कटल्यान्ड समान ११ अंक छ । शीर्ष चारमा रहने राष्ट्रले अर्को वर्ष हुने विश्वकप छनोटमा सोझै प्रवेश पाउँछ ।

अंकतालिकाको शीर्ष चार भित्र पर्नका लागि सोमबारको खेल नेपाललाई निकै महत्वपूर्ण छ । च्याम्पियनसिपमा यसपछि नेपालले हङकङ र संयुक्त अरब इमिरेट्ससँग प्रतिस्पर्धा गर्नुपर्नेछ ।