कीर्तिपुर (हाम्रो खेलकुद)– पार्ट टाइमर बलर शरद भेषवाकर झन्डै दुई बर्ष पछि राष्ट्रिय टोलीमा पुनरागमन गरेका महबुब आलमको उच्च बलिङबाट प्रेरित नेपालले दोस्रो खेलमा केन्यालाई १ सय ५५ रनमा अलआउट गरेको छ ।

शरदले ७.१ ओभरमा २८ रन दिदै  ४ विकेट र महबुब आलमले ७ ओभरमा ५ मेडनसहित दुई विकेट लिएपछि पहिले ब्याटिङ गरेको केन्या ४६.१ ओभरमा अलआउट भएको थियो । नेपाललाई केन्याले अब जितका लागि १ सय ५६ रन बनाउनुपर्नेछ । विश्व क्रिकेट लिग च्याम्पिनसिपअन्तर्गत केन्यासँगको पहिलो खेल शनिबार ५ विकेटले गुमाएको नेपालले सोमबार टस जितेर फिल्डिङको निर्णय लिएको थियो ।

लगातार दास्रो खेलमा नियमित कप्तान पारस खड्काको ठाँउमा नेतृत्व सम्हालेका ज्ञानेन्द्र मल्लको फिल्डिङ रोज्ने निर्णयलाई जायज ठहराउने क्रममा बलरहरुले उच्च प्रदर्शन गरेका छन् । महबुबले ७ ओभरको आफ्नो पहिलो स्पेलमा उत्कृष्ट बलिङ गरेका थिए । चौथो ओभरमै २ विकेट लिएका आलमले पहिलो ६ ओभरमा ५ मेडनसहित २ रन दिएर २ विकेट लिएका थिए । महसुबले ओपन एलेक्स ओबान्डा (९) र धिरेन गोन्डारिया (०) को विकेट लिएका थिए । समग्रमा ७ ओभरमा महबुबले ५ मेडनसहित ११ रन खर्चेका थिए ।

नेपाली बलरहरुले कसिलो बलिङ गर्नाका वावजुद केन्याका खेलाडीले आफ्नै गतिमा रन जोडेका थिए । ओपनर इरफान कसिम र कोलिन्स ओवुयाले तेस्रो विकेटका लागि ७९ रनको साझेदारी गरेपछि केन्या सम्हालिएको थियो । २ रनले अर्धशतक बनाउनबाट चुकेका कोलिन्सको विकेट सन्दीप लामिछानेले लिएका थिए । ७८ बल खेलेका उनले ७ चौकाको मद्दतमा ४८ रन बनाएका थिए । शरद भेषावरकेको बलमा आउट भएका इरफानले ३८ रन बनाएका थिए । २१ रन बनाएका कप्तान राकेप पटेल वसन्त रेग्मीको शिकार भएका थिए । पटेललाई सोमपाल कामीले क्याच गरेका थिए । ४५ औं ओभरमा शरदले लगातार दुई विकेट लिदै केन्यामाथि दबाव बढाएका थिए । बसन्तले २, सागर पुन र सन्दीप लामिछानेले समान १ विकेट लिएका थिए ।

केही महिनाअघि नेदरल्यान्ड्सलाई उसकै मैदानमा एउटा खेलमा हराएर फर्केको नेपालले घरेलु मैदानमा शनिबार केन्यालाई हराउने अपेक्षा गरिएको थियो । तर, बर्षाले प्रभावित खेलमा अनुभवी केन्याले नेपालसँगको खेल ५ विकेटले आफ्नो पक्षमा पार्यो ।

च्याम्प्यिनसिपको शीर्ष ४ भित्र पर्न सम्भावनालाई जीवित राख्न नेपालले आजको खेलमा केन्यालाई हराउनु पर्ने हुन्छ । पहिलो खेलमा नेपाललाई हराएको केन्या पाँच खेल बाँकी रहदा १० अंकसहित पाँचौ स्थानमा छ । ८ राष्ट्र सहभागिता रहेको च्याम्पियनसिपमा नेपाल ६ अंकसहित छैटौं स्थानमा छ । नेदरल्यान्ड्स १६, पपुवा न्यु गिनी १२, तथा हङकङ र स्कटल्यान्ड समान ११ अंक छ । शीर्ष चारमा रहने राष्ट्रले अर्को वर्ष हुने विश्वकप छनोटमा सोझै प्रवेश पाउँछ ।

च्याम्पियनसिपका च्याम्पियनसिपमा यसपछि नेपालले हङकङ र संयुक्त अरब इमिरेट्ससँग प्रतिस्पर्धा गर्नुपर्नेछ ।