काठमाडौं (हाम्रो खेलकुद)– झन्डै दुई सातापछि सुरु हुने एसिसी इमर्जिङ कप क्रिकेट प्रतियोगितामा नियमित कप्तान पारस खड्का नखेल्ने भएका छन् । पूर्ण रुपमा फिट भइ नसकेका कारण आफुले इमर्जिङ कप नखेल्ने व्यवस्थापन पक्षलाई जानकारी दिइसकेको पारसले सोमबार बताएका छन् । इमर्जिङ कप मार्च २५ देखि बंगलादेशमा सुरु हुँदैछ ।

‘मेरो स्वास्थ्यमा सुधार अइरहेको छ । तर पनि मलाई पुरा फिट हुन अझै एक महिना लाग्न सक्छ,’ केन्यासँगको जितपछि उनले भने,‘इमर्जिङ कप खेल्दिन भनेर मैले व्यवस्थापनलाई जानकारी दिइसकेको छु ।’

केही साता अघि पेटको शल्यक्रिया गरेका पारस गत साताबाट मात्र अभ्यासमा फर्केका थिए । पूर्ण रुपमा ठिक नभइसकेका कारण उनले विश्व लिग क्रिकेट च्याम्पियनसिपअन्तर्गत केन्याविरुद्धका दुई खेल खेलेनन् । उनको सट्टा उपकप्तान ज्ञानेन्द्र मल्लले नेपाली टोलीको नेतृत्व सम्हालेका थिए ।

शनिबारको खेल केन्यासँग ५ विकेटले गुमाएको नेपालले सोमबार त्यहि टोलीलाई ७ विकेटले हराएको छ । पेटको शल्यक्रिया गरेपछि आराम गरिरहेका पारस टोलीसँग केन्याविरुद्धको तयारीका लागि भारत भ्रमणमा सामेल भएनन् ।

प्रतियोगितामा नेपालसहित अफगानिस्तान, टेष्टमान्यता प्राप्त भारत, श्रीलंका, पाकिस्तान, बंगलादेशले इमर्जिङ कपमा सहभागिता जनाउनेछन् । टेष्ट मान्यता प्राप्त राष्ट्र यू २३ व्यस्तताका कारण देखाउँदै हङकङ र युएईले भने इमर्जिङ कपबाट नाम फिर्ता लिइसकेका छन् ।