काठमाडौँ (हाम्रो खेलकुद)– दस दिनपछि बंगलादेशमा सुरु हुने एसिसी इमर्जिङ कप क्रिकेट प्रतियोगिताका लागि पारस खड्कासहित चार खेलाडीलाई आराम दिएको छ । इमर्जिङ कप मार्च २५ बाट सुरु हुनेछ ।

ज्ञानेन्द्र मल्लको कप्तानीमा इमर्जिङ कपका लागि १५ सदस्यीय नेपाली टोलीको बुधबार घोषणा भएको छ । पारसले पूर्ण रुपमा फिट भइ नभएका कारण यसअघि नै बंगलादेश नजाने बताइसकेका थिए । सिनियर खेलाडी शक्ति गौचन , वसन्त रेग्मी र सोमपाल कामीलाई पनि बंगलादेशमा भ्रमणका दौरान आराम दिएको छ । शक्ति र वसन्त स्पिनर हुन् भने सोपपाल तीब्रत गतिका बलर हुन् ।

नयाँ खेलाडीलाई मौका दिने योजना अनुरुप टोलीको छनोट गरेको प्रशिक्षक जगत टमाटाले बताएका छन् । ‘नयाँ खेलाडीलाई मौका दिदै भविष्यमा राष्ट्रिय टोलीको ब्याकअप तयार पार्ने योजनाका साथ अहिलेको टोली छनोट गरिएको हो,’प्रशिक्षक टमाटाले भने,‘त्यसैले केहि सिनियर खेलाडीलाई आराम दिएका हौं । सोमपाल सामान्य चोट छ ।’

शरद भेषावकरलाई रहेको टोलीमा विनोद भण्डारी , सागर पुन , मेहबुब अलाम , दिपेन्द्र सिंह ऐरी , सुनिल धमला , सन्दिप लामिछाने, आरिफ शेख , आसिफ शेख , दिलप नाथ , अभिनाश कर्ण , सुसान भारि, दिपेश श्रेष्ठ र भुवन कार्र्की रहेका छन् ।

प्रशिक्षक टमाटाले १९ मार्चबाट टोलीको प्रशिक्षण सुरु हुने बताएका छन् । विश्व क्रिकेट लिग च्याम्प्यिनसिपअन्तर्गत केन्याविरुद्ध शनिबार र सोमबार दुई खेलपछि खेलाडीलाई केही दिनको विदा दिइएको छ । पहिलो खेल शनिबार ५ विकेटले गुमाएको नेपालले दोस्रो खेल ७ विकेटले जितेको थियो । पारसले केन्याविरुद्धका दुवै खेल गुमाएका थिए ।

पारस खड्का, प्रशिक्षक जगत टमाटा र आईसीसीका प्रतिनिधि राजु बैंकटपति रहेको छनोट समितिले राजेश पुलामी, कुशल भुर्तेल , जितेन्द्र मुखिया र सुशील कंडेललाई वैकल्पिक खेलाडीका रुपमा राखेको छ । भारत, पाकिस्तान, श्रीलंका र बंगलादेशको यू–२३ टिम तथा नेपालसहित अफगानिस्तान, हङकङ र मलेसियाको राष्ट्रिय टोलीले बंगलादेशमा प्रतिस्पर्धा गर्नेछन् । नेपाली टोली मार्च २५ मा बंगलादेश प्रस्थान गर्नेछ ।