काठमाडौं (हाम्रो खेलकुद) – यसै महिनाको अन्त्यमा सुरु हुने सगरमाथा सिमेन्ट धनगढी प्रिमियर लिगको सहायक प्रयोजकका रुपमा किरण शु म्यानिफेक्चरको उत्पादन गोल्डस्टार शु जोडिएको छ । आयोजक धनगढी क्रिकेट एकेडेमीका अध्यक्ष सुवाश शाही तथा किरण शु म्यानिफेक्चरका निर्देशक बिधुशी राणाले शुक्रबार राजधानीमा आयोजित कार्यक्रममा सम्झौता पत्रमा हस्ताक्षर गरे ।

सम्झौता अनुसार सहायक प्रयोजकका रुपमा कम्पनीले आयोजक धनगढी क्रिकेट एकेडेमीलाई ५ लाख रुपैयाँ बराबरको प्रायोजन गर्ने सहमती भएको निर्देशक राणाले बताइन् । खेलकुदले राष्ट्रिय एकता तथा सामाजिक सदभाव जोगाईराख्न मद्दत गर्ने जनाउँदै राणाले भनिन् ,‘ सोही मनोभावलाई आत्मसात गर्दै सगरमाथा सिमेन्ट धनगढी क्रिकेट लिगसँग हामी जोडिन पाएकोमा खुसी लागेको छ ।’ स

सगरमाथा सिमेन्ट धनगढी प्रिमियर लिगमा गोल्ड स्टार आबद्ध भएकोमा धन्यवाद दिदै एकेडेमीका अध्यक्ष शाहीले नेपाली क्रिकेटका लागि गोल्डस्टार पनि जोडिएको खुसी व्यक्त गरे । सगरमाथा सिमेन्ट धनगढी प्रिमियर लिग आगामी चैत्र २७ देखि बैशाख ९ गतेसम्म धनगढीमा आयोजना हुदैछ।

प्रतियोगितामा देशभरिका विभिन्न ६ वटा टिमहरुले सहभागिता जनाउँदै छन् । पहिलो पटक चैत ५ का लागि मिति तोकिएपछि बंगलादेशमा मार्च २५ देखि इमर्जिङ कप क्रिकेटका कारण प्रतियोगिता सारिएको थियो ।